बीड - हिंगणगावमधील मयत ऊस उत्पादक शेतकरी नामदेव जाधव यांनी केलेल्या आत्महत्येची दखल आता मानवी हक्क आयोगाने घेतली आहे. या प्रकरणात बीडच्या (Beed) जिल्हाधिकाऱ्यांसह साखर आयुक्तांना समन्स बजावण्यात आले आहेत. हिंगणगाव शेतकरी (Farmer) आत्महत्या प्रकरणी तातडीने अहवाल देण्याचे आदेश आयोगाने दिले असून 13 जून रोजी आयोगासमोर उपस्थित राहण्याचे आदेश देण्यात आले आहे.

हे देखील पाहा -

गेवराई तालुक्यातील हिंगणगाव येथील ऊस उत्पादक शेतकरी, नामदेव जाधव यांनी उसाच्या फडाला आग लावून स्वतः गळफास घेऊन आत्महत्या केली होती. अतिरिक्त ऊसाची प्रशासनाने दखल न घेतल्याने ही आत्महत्या झाल्याचे माध्यमांनी मांडले होते. आता मानवी हक्क आयोगाने या आत्महत्येची स्वतःहून दखल घेतली आहे.

या प्रकरणात तातडीने अहवाल दाखल करण्याचे आदेश आयोगाने बीडच्या जिल्हाधिकाऱ्यांसह राज्याच्या साखर आयुक्तांना दिले आहेत. या प्रकरणात 13 जून रोजी पुढील सुनावणी होणार असून त्यासाठी जिल्हाधिकारी आणि साखर आयुक्तांनी हजर रहावे म्हणून आयोगाने समन्स बजावले आहे.

Edited By - Shivani Tichkule