अमर घटारे, अमरावती प्रतिनिधी

father and daughter killed in Amravati road accident old bypass road : अमरावतीच्या जुन्या बायपास रोडवर रविवारी रात्री एका भीषण रस्ते अपघातात बाप-लेकीचा जागीच मृत्यू झाल्याची धक्कादायक घटना घडली आहे. आनंद मार्बल फॅक्टरीसमोर एका भरधाव वेगात असणाऱ्या कारने दुचाकीला जोरात धडक दिली. धडक इतकी भीषण होती की दुचाकीवरील तिघेही जण हवेत उडून ५० फूट लांब फेकले गेले. या अपघातात बाप-लेकीचा जागीच मृत्यू झाला, तर दुसरी मुलगी गंभीर जखमी आहे.

या थरारक अपघातात गजानन माकोडे आणि त्यांची मोठी मुलगी सपना यांचा घटनास्थळीच मृत्यू झाला. जखमी प्रियंका माकोडे हिला तातडीने जिल्हा सामान्य रुग्णालयात दाखल करण्यात आले असून तिची प्रकृती चिंताजनक आहे. प्रत्यक्षदर्शींनी दिलेल्या माहितीनुसार, कार चालक मद्यधुंद अवस्थेत होता. अपघातानंतर तो गाडी सोडून फरार झाला आहे. पोलिसांकडून या प्रकरणी गुन्हा दाखल केला असून तपास करण्यात येत आहे.

मिळालेल्या माहितीनुसार, गजानन श्रीराम माकोडे (५५) हे आपल्या दोन मुली सपना माकोडे (२४) आणि प्रियंका माकोडे (२३) यांच्यासह दुचाकीने जात होते. जुन्या बायपास रोडवरील आनंद मार्बल फॅक्टरीसमोरून जात होते. त्यावेळी मागून येणाऱ्या एका भरधाव कारने दुचाकीला जोराची धडक दिली. धडक इतकी भीषण होती की तिघेही हवेत उडून रस्त्यापासून सुमारे ६० फूट लांब फेकले गेले.

अपघातानंतर कार चालक घटनास्थळावरून फरार झाला आहे. प्रत्यक्षदर्शींच्या दाव्यानुसार, कारमधील तरुण मद्यधुंद अवस्थेत होता. कार अतिशय वेगात होती. या अपघातामुळे परिसरात हळहळ व्यक्त करण्यात येत असून काहीजणांकडून संतापही व्यक्त करण्यात येत आहे. अपघाताची माहिती मिळताच पोलिसांनी घटनास्थळी धाव घेत पंचनामा केला आहे. फरार कार चालकाचा शोध घेण्यासाठी पोलिसांनी सीसीटीव्ही फुटेज तपास सुरू केला आहे.