नांदेड शहरातून धक्कादायक घटना समोर आली आहे. नांदेड शहरात होमिओपॅथीच्या द्वितीय वर्षात शिक्षण घेणाऱ्या युवतीने गळफास घेऊन आत्महत्या केली. नांदेड शहराच्या हडको भागात ही घटना घडली. विद्यार्थिनीच्या आत्महत्येने कॉलेजमध्ये खळबळ उडाली आहे. पोलिसांनी या प्रकरणी तपासाला सुरुवात केली आहे.

नांदेडच्या हडको येथील पद्मश्री शामराव कदम बी एच एम एस कॉलेजमध्ये 25 वर्षीय आकांक्षा गायकवाड ही विद्यार्थनी शिकत होती. ती राष्ट्रवादीचे काँग्रेसचे पदाधिकारी असलेले जीवन घोगरे पाटील यांच्या निवासस्थानी इतर मुलींसोबत कॉट बेसिसवर राहत होती. आकांक्षाने रुममधील पंख्याला ओढणी बांधून दुपारी गळफास घेतल्याचे उघड झाले.

आकांक्षाने आत्महत्या केल्याचे कळताच पोलिसांनी घटनास्थळी धाव घेतली. ग्रामीण पोलीसांनी तात्काळ धाव घेत पंचनामा केला. आकांक्षाचा मृतदेह उत्तरीय तपासणीसाठी पाठवण्यात आला. आकांक्षाने आत्महत्या का केली, याचे कारण अद्याप समोर आले नाही. मुलीने आत्महत्या केली नसून तिची हत्या करून गळफास दिल्याचा आरोप आकांक्षाच्या वडिलांनी केलाय. आकांक्षाने नेमकी कोणत्या कारणामुळे आत्महत्या केली याचा तपास पोलीस करताहेत.

जळगावमध्ये तरुणाने आयुष्य संपवलं

जळगावच्या एरंडोल तालुक्यातील भातखेडा येथील तरुणाची सासरच्या मानसिक त्रासाला कंटाळून आत्महत्या केल्याची घटना घडली. गौरव ज्ञानेश्वर बडगुजर असे आत्महत्या करणारा तरुणाचे नाव असून त्याने आत्महत्येपूर्वी चिठ्ठी लिहिली. या चिठ्ठीत सासू, मेव्हणी, साडू यांच्या मानसिक त्रासाला कंटाळून आत्महत्या करत असल्याचा उल्लेख केला आहे. या प्रकरणी मृत तरुणाच्या सासू, मेव्हणीसह तीन जणांविरुद्ध कासोदा पोलिस ठाण्यात आत्महत्येस प्रवृत्त केल्याप्रकरणी गुन्हा दाखल करण्यात आला.