हिंगोली : धनगर समाजाला एसटी प्रवर्गातून आरक्षण देण्याची मागणीसाठी धनगर समाज आक्रमक झाला आहे. आरक्षणाची मागणी करत सरकारच्या विरोधात धनगर समाज रस्त्यावर उतरला असून ठिकठिकाणी रास्ता रोको आंदोलन करण्यात आले आहे. तर हिंगोलीमध्ये राज्य मार्गावर मेंढ्या आणून मार्ग रोखण्यात आला आहे. यामुळे वाहतूक कोंडी झाली आहे. 

धनगर समाजाला एसटी प्रवर्गातून आरक्षणाची अंमलबजावणी करण्याची मागणी मागील काही दिवसांपासुन केली जात आहे. मात्र अद्याप सरकारकडून दखल घेतली जात नसल्याने धनगर समाजाने आक्रमक भूमिका घेतली आहे. या मागणीसाठी लातूर- अंबाजोगाई महामार्गावरच्या महापूर पाटी येथे सकल धनगर समाजाच्या वतीने चक्काजाम आंदोलन करण्यात आला आहे. तर जालना येथे दीपक बोराडे मागच्या पंधरा दिवसापासून आमरण उपोषण करत आहेत. या उपोषणाच्या समर्थनात आणि पाठिंबा दर्शविण्यासाठी देखील हा रास्ता रोको करण्यात आला आहे.

मेंढ्या आणत राज्यमार्ग रोखला 

हिंगोलीत धनगर समाज सरकारच्या विरोधात आक्रमक झाला आहे. हिंगोलीच्या औंढा जिंतूर टी पॉइंटवर रास्ता रोको आंदोलनादरम्यान राज्य मार्गावर मेंढ्या दाखल करत मार्ग रोखला आहे. रस्त्यावरती मेंढ्या बसवल्याने वाहतूक कोंडी मोठ्या प्रमाणात झाली आहे. तर पोलिसांनी धनगर बांधवांना विनंती करत रस्त्यावरील मेंढ्या बाजूला करण्याचे आवाहन केले. मात्र सरकार आंदोलनाची दखल घेत नसल्याने मेंढ्या रस्त्यावर घेऊन उतरण्याची वेळ आल्याचे आरक्षणासाठी आंदोलन करणाऱ्या धनगर बांधवांनी सांगितले आहे. 

धाराशिव जिल्ह्यातील तीन महामार्गावर आंदोलन

धाराशिव : धनगर समाजाला एसटी प्रवर्गातून आरक्षणाची अंमलबजावणी करा; या मागणीसाठी धनगर समाजाने आक्रमक भूमिका घेतली आहे. यासाठी धाराशिव जिल्ह्यातील तीन महामार्गावर आंदोलन सुरू आहे. तुळजापुर तालुक्यातील इटकळ सोलापूर महामार्गावर देखील धनगर बांधव रस्त्यावर उतरले असून इटकळ गावात शेकडो धनगर बांधव रस्त्यावर उतरले आहेत.