Fire News :

हिंगोलीच्या वसमत शहरालगत असलेल्या हळदीच्या एका मोठ्या गोडाऊनमध्ये आग लागली आहे. आज सकाळी अचानक गोडाऊनमधून धूर निघत असल्याने परिसरातील नागरिकांनी पाहणी केल्याने ही घटना उघडकीस आली आहे.

या घटनेची माहिती मिळताच वसमत पालिकेच्या अग्निशमन पथकाने तातडीने घटनास्थळी दाखल होत आगीवर नियंत्रण मिळविण्याचा प्रयत्न केला. मात्र गोडाऊनमधील प्लास्टिक पिशव्यांमुळे आगीने रौद्ररूप धारण केले. त्यामुळे आगीचे मोठे लोळ बाहेर दिसत होते. मात्र तीन तासांच्या अथक परिश्रमानंतर परिसरातील कामगार व अग्निशमन पथकाला आगीवर नियंत्रण मिळविण्यात यश आल आहे.

या घटनेत व्यापाऱ्यांनी शेतकऱ्यांची खरेदी केलेली कोट्यवधी रुपयांची हळद जळून खाक झाली आहे. वसमत पोलिसात घटनेप्रकरणी नोंद करण्यात आली असून आगीचं कारण शोधण्यासाठी वसमत पोलिसांनी तपास सुरू केला आहे. ऐन होळीच्या दिवशी आग लागल्याची घटना घडल्याने परिसरात भीतीचं वातावरण पसरलं आहे.

अलीपूरमध्ये कारखान्याला भीषण आग

दिल्लीतील अलीपूर भागात देखील आगीची मोठी घटना समोर आली आहे. एका कारखान्याला सोमवारी आज पहाटेच्या सुमारास अचानक आग लागली. क्षणार्धात आगीने रौद्ररुप धारण करत संपूर्ण कारखान्याला विळखा घातला. आगीमुळे परिसरात काळ्याकुट्ट धुळाचे लोळ उठलेत.

आगीची माहिती मिळताच अग्निशमन दलाचे ३४ बंब घटनास्थळी दाखल झालेत. सध्या आगीवर नियंत्रण मिळवण्याचे प्रयत्न सुरू आहेत. सुदैवाने या घटनेत अद्याप कोणतीही जीवितहानी झालेली नाही.