हातात सोन्याच्या अंगठ्या, गळ्यात सोनसाखळी आणि तोंडातून अर्वाच्च भाषेत शिवीगाळ.. हा आहे.. विकास पाठक उर्फ रिल्स्टार हिंदुस्थानी भाऊ..याचं हिंदुस्थानी भाऊनं माधुरी हत्तीणीवरून थेट कोल्हापूरकरांना शिवीगाळ करत आक्षेपार्ह विधान केलीयेत. माधुरीसाठी सोशल मीडियातून कोल्हापूरकरांनी रान उठवलेलं असताना पेटानं समाजमाध्यमांवर टाकलेले पुराव्यांचा दाखला देत हिदुस्थानी भाऊ पुन्हा बरळलाय.

पाहिलतं, ही या मस्तवाल हिंदुस्थानी भाऊची शिवराळ भाषा माधुरीवरून एकत्र आलेले कोल्हापूरकर इतके दिवस कुठे होते? असा सवालही हा हिंदुस्थानी भाऊ विचारतोय..या मस्तवाल हिंदुस्तानी भाऊचा माज उतरवण्याचा इशाराच कोल्हापूरकरांनी दिलाय. सोशल मिडीयावरच कोल्हापूरकरांनी या हिंदुस्थानी भाऊला आपला हिसका दाखवल्यानंतर त्याने कॉमेंटचा ऑपशन आपल्या पेजवरून काढून तर टाकलाच पण या दणक्यानंतर त्याला कोल्हापूरकरांची माफी मागावी लागली.

हिंदुस्थानी भाऊ सातत्यानं सामाजिक तेढ वाढवणाऱ्या व्हिडीओमुळे वादाच्या भोवऱ्यात अडकलाय. त्यात आता कोल्हापूरकरांच्या नादी लागल्यानं भाऊंचाच गेम झालाय. त्यामुळे या भाऊची भाऊगिरी नेमकी कुणाच्या फायद्यासाठी होती? शिवराळ भाषा वापरून कोल्हापूरकारांना डिवचण्याचा खोडसाळपणा त्यानं नेमकं का केला? 'पेटा'च्याच पुराव्यांवरून हिंदुस्थानी भाऊनं माधुरीला परत आणू नये यासाठी वाद कशासाठी पेटवला? याची उत्तर या तथाकथित रिल्सस्टारला द्यावीच लागतील.