गोंदिया: गोंदिया (Gondiya) जिल्ह्यातल्या मोरगांव अर्जुनी तालुक्यातील नवनीतपूर (Navneetpur) गावात एक भयंकर घटना घडली. मित्रासोबत कॅनॉलमध्ये पोहण्यासाठी गेलेल्या एका 14 वर्षीय मुलाचा बुडून मृत्यू झाला आहे. बुधवारी (11 मे) दुपारच्या सुमारास ही घटना घडली. हितेश यशवंत भोयर (वय 14) असं मृत झालेल्या मुलाचं आहे. बचावपथकाच्या अथक प्रयत्नानंतर हितेशचा मृतदेह पाण्याबाहेर काढण्यात आला. (Gondiya Navneetpur Latest News)

मिळालेल्या माहितीनुसार, बुधवारी दुपारीच्या सुमारास हितेश आपल्या मित्रांसोबत गावानजीक असलेल्या कॅनॉलमध्ये पोहण्यासाठी गेला होता. तेव्हा त्याने पोहण्यासाठी पाण्यात उडी घेतली. मात्र पाण्याचा अंदाज न आल्याने तो बुडाला. त्यावेळी तेथे उपस्थित असलेल्या इतर मित्रांनी त्याला वाचवण्याचा प्रयत्न केला. मात्र हितेश वाहून जात असल्याचं पाहत त्यांनी गावात जाऊन आरडाओरड केली.

घडलेला सर्व प्रकार गावकऱ्यांना सांगितल्यानंतर गावकऱ्यांनी तातडीने घटनास्थळी धाव घेतली. मात्र तोपर्यंत खूप उशीर झाला होता. दरम्यान, गावकऱ्यांनी तातडीने या घटनेची माहिती स्थानिक पोलिसांना दिली. त्यानंतर गोंदियातील बचाव पथकाला पाचारण करण्यात आले. बचाव पथकाच्या अथक प्रयत्नानंतर गुरूवारी (12 मे) हितेशचा मृतदेह सापडला. स्थानिक पोलिसांनी मृतदेह आपल्या ताब्यात घेत शवविच्छेदनाकरिता मोरगांव अर्जुनी ग्रामीण रुग्णालयात पाठवला आहे. हितेशच्या अशा दुर्देवी मृत्युमुळे नवनीतपूर गावात शोककळा पसरली आहे.

Edited By - Satish Daud