शुभम देशमुख 
गोंदिया : चालू लाईन असलेल्या खांबावर चढून काम करत असताना विजेचा जोरदार झटका बसल्याने गावातील एका तरुणाचा मृत्यू झाला. सदरची घटना गोंदियाच्या दासगाव येथे घडली असून या प्रकरणी संबंधित लाईनमन विरोधात रावणवाडी पोलीस ठाण्यात गुन्हा दाखल करण्यात आला आहे. 

महावितरण विभागाचे कर्मचारी लाईनमन असलेले तरोणे यांनी आपल्या कामासाठी गावातील नितेश बिसेन (वय २७) या तरुणाला काम करण्यास सांगत होते. दरम्यान गावात लाईटची समस्या असल्याने त्याची दुरुस्ती करण्यासाठी तरोणे यांनी नितेश बिसेन या तरुणाला सांगितले. इतकेच नाही तर लाईट चालू असलेल्या खांबावर (Gondia) चढवून काम करून घेत होते. दरम्यान काम करत असताना अचानक विजेचा धक्का लागल्याने नितेश बिसेन यांचा जागीच मृत्यू झाला. 

त्या लाईनमन विरुद्ध गुन्हा दाखल 

घटनेनंतर मृत तरुणाच्या संतप्त नातेवाइकांनी चांगलाच गोंधळ घातला. सदरच्या घटनेबाबतची माहिती पोलीस विभागाला देण्यात आली. यानंतर नातेवाईकांनी दिलेल्या फिर्यादीवरून याप्रकरणी रावणवाडी पोलिस ठाण्यात लाइनमनविरुद्ध गुन्हा दाखल करण्यात आला असून पुढील तपास सुरू आहे.