शुभम देशमुख 
गोंदिया : गोंदिया जिल्ह्यात सध्या विविध आजारांची साथ सुरू असून जिल्हावासी पार त्रासून गेले आहेत. त्यातच आता (Gondia) धक्कादायक बाब म्हणजे मलेरियामुळे दोघांचा जीव गेल्याची नोंद झाली आहे. यावरून डेंग्यूपेक्षा मलेरियाच (Malaria) जास्त डेंजरस म्हटल्यास वावगे ठरणार नाही. (Live Marathi News)

पावसाळा म्हटला म्हणजे आजारांना आमंत्रण देणारा कालावधी ठरत असतो. आतापर्यंत डोळ्यांची साथ सर्वत्र पसरलेली होती. हि साथ आटोक्यात आली असतानाच आता तापाच्या साथीने जिल्हा फणफणला आहे. यामध्ये व्हायरल, टायफॉईडचा ताप असतानाच मलेरियाच्या तापाचे रुग्ण वाढले आहेत. गोंदिया शहरापुरतीच साथ नसून अवघ्या जिल्ह्यालाच डासांनी ग्रासून सोडले आहे. डासांपासून मलेरिया व डेंग्यूचा जास्त प्रमाणात धोका दिसून येतो. जिल्ह्यात डेंग्यूपेक्षा मलेरियाच जास्त जीवघेणा ठरत असल्याचे चित्र पाहावयास मिळत आहे. 

२०२ रुग्णांची नोंद 

डेंग्यूच्या रुग्णांची साथ अनेक ठिकाणी पहावयास मिळत आहे. मात्र गोंदिया जिल्ह्यात मागील आठ महिन्यांत मलेरियाच्या २०२ रुग्णांची नोंद घेण्यात आली आहे. यात आता २ रुग्णांचा मृत्यू झाल्याचे समोर आले आहे. यामुळे जिल्हावासीयांनी डासांपासून जास्त सावध राहणेच गरजेचे झाले आहे.