संजय महाजन, साम टीव्ही

जळगाव: गेल्या काही दिवसांपासून गगनाला भिडलेल्या सोन्या चांदीचे दर आता कोसळले आहे. जळगावच्या सुवर्ण नगरीत गेल्या आठ दिवसात सोन्याच्या दरात 3 हजार रुपयांची तर चांदीच्या दरात तब्बल 7 हजार रुपयांची मोठी घसरण झाली आहे. यामुळे दागिने खरेदी करू इच्छिणाऱ्या ग्राहकांना मोठा दिलासा मिळाला आहे.

मार्केट स्थिर झाल्याचा परिणाम

आंतरराष्ट्रीय बाजारपेठेत डॉलर मजबूत झाल्याने आणि जागतिक मार्केटमध्ये स्थिरता आल्याने मौल्यवान धातूंच्या किमती कमी झाल्या आहेत. आज एकाच दिवसात सोन्याचे दर 1700 रुपयांनी, तर चांदीचे दर 7 हजार रुपयांनी कोसळले आहेत. सद्यस्थितीत जळगावात जीएसटीसह सोन्याचा दर 1,52,300 रुपये आणि चांदीचा दर 2,51,500 रुपयांवर पोहोचला आहे.

दरात झालेली ही घसरण ग्राहकांसाठी सुवर्णसंधी असली तरी ही स्थिति फार काळ टिकणार नसल्याचे संकेत मिळत आहेत. मार्केटमध्ये सध्या घसरण दिसत असली तरी आगामी काळात सोन्या चांदीच्या दरात पुन्हा वाढ होण्याची शक्यता आहे, असा अंदाज जलगावचे सुवर्ण व्यावसायिक गिरीश डेरे यांनी व्यक्त केला आहे.

दरम्यान सध्या लग्न सराई सुरू असल्याने मोठ्या प्रमाणात सोने चांदी खरेदीचे प्रमाण वाढले आहे. आज भाव कोसळल्याने बऱ्यापैकी दिलासा हा आता ग्राहकांना मिळणार आहे.