संजय महाजन, साम टीव्ही

जळगाव: अमेरिका आणि इराण यांच्यात झालेल्या शांतता करारानंतर जागतिक बाजारात मोठे बदल पाहायला मिळत आहेत. याचा थेट परिणाम आता सोन्या-चांदीच्या दरांवर झाला असून आज मोठी घसरण जळगावच्या सराफ बाजारात झाली आहे. अमेरिका-इराण शांतता करारानंतर सोन्या चांदीच्या दरात सातत्याने चढ-उतार सुरू आहेत. मात्र, आजच्या घडीला बाजारात मोठी घसरण पाहायला मिळाली. आज सोन्याच्या दरात 4 हजार 500 रुपयांची घट झाली आहे, तर चांदीच्या दरात 13 हजार रुपयांची घसरण नोंदवली गेली आहे. जळगावच्या बाजारात सध्या सोन्याच्या दर जीएसटीसह 1 लाख 49 हजार रुपयांवर पोहोचला आहे, तर चांदीचा दर 2 लाख 44 हजार रुपयांवर आहे.

सोने चांदीचे आजचे दर

सोने 4,500 रुपये

चांदी 13,000 रुपये

सोने दर: ₹1,49,000 (GST सहित)

चांदी दर: ₹2,44,000 (GST सहित)

या घसरणीमागे अनेक करणे सांगितली जात आहेत. अमेरिकन बँकांच्या व्याजदर धोरणामुळे डॉलर मजबूत झाला आहे. त्याचबरोबर गुंतवणूकदारांकडून प्रॉफिट बुकिंग करण्यात येत असून जागतिक पातळीवरील तणाव कमी झाल्याने सुरक्षित गुंतवणूक म्हणून सोन्याकडे असलेला कलही काहीसा कमी झाला आहे. डॉलर मजबूत झाल्यामुळे आणि जागतिक तणाव कमी झाल्यामुळे सोन्या-चांदीचे दर खाली आले आहेत. पुढील काळातही दरात आणखी चढ-उतार होण्याची शक्यता आहे. आगामी काळात सोन्या-चांदीच्या दरात आणखी घसरण होण्याची शक्यता सोने व्यावसायिकांनी व्यक्त केली आहे. त्यामुळे गुंतवणूकदारांसाठी हा काळ महत्त्वाचा ठरणार आहे. अशी माहिती सराफ बाजारातील व्यापाऱ्यांनी दिली आहे.