मंगेश भांडेकर

Gadchiroli News : गडचिरोलीमधील एका एसटी बसचा व्हिडीओ सध्या सोशल मीडियावर व्हायरल होत आहे. राज्यातील एसटी बसची चिंताजनक स्थिती या व्हिडीओतून दिसत आहे. व्हिडिओमध्ये एसटी महामंडळाच्या बसचं छप्पर उडताना दिसत आहे. गडचिरोलीतील अहेरी आगारची अतिशय खराब अवस्थेत ही बस रस्त्यावरून धावताना दिसत आहे. यामुळे प्रवाशांच्या सुरक्षेचा प्रश्नही अनेकांकडून उपस्थित केला जात होता.

एसटी महामंडळाच्या अनेक बस जीर्ण झाल्या आहेत. त्यामुळे अनेक ठिकाणी सर्वसामान्य नागरिकांना जीव मुठीत धरून प्रवास करावा लागत आहे. गडचिरोलीच्या रस्त्यावरून भरधाव धावणाऱ्या लाल परीचं छत एका बाजूने हवेत उडताना दिसत आहे. (Viral News)

बसचे छत हवेत डोलत असतानाही बस वेगाने धावत आहे. अशातच अर्धे लटकलेले हे छत उडून गेल्यास जीवितहानी होण्याचीही दाट शक्यता होती. सुदैवाने काहीही झाले नाही. मात्र सुदैवाने हा व्हिडीओ व्हायरल झाला आणि एसटी महामंडळाला जाग आली. (Latest Marathi News)

अभियंता निलंबित

व्हिडीओ व्हायरल झाल्यानंतर एसटी महामंडळाने या प्रकरणी संबंधित अभियंत्याला निलंबित केले आहे. बसचे काम वेळेत पूर्ण न करणे, बस त्रुटींसह वाहतुकीसाठी उपलब्ध करुण दिल्याचा ठपका अभियंत्यावर ठेवण्यात आला आहे. प्रवाशांच्या सुरक्षिततेला सर्वोच्च प्राधान्य देऊन बसेस मार्गस्थ कराव्यात असे निर्देशही आगार व्यवस्थापनाला देण्यात आले आहेत.