- संजय डाफ / मंगशे भांडेकर

Gadchiroli News : प्रस्तावित खाणीवरुन नक्षलवाद्यांनी मंत्री धर्मरावबाबा आत्राम (Dharmarao Baba Atram) यांना धमकी दिल्याने पाेलिस यंत्रणा सतर्क झाली आहे. दरम्यान आत्राम यांच्या सुरक्षेची काळजी कडेकाेट घेतली जात आहे असे संदीप पाटील (डीआयजी, नागपूर गडचिरोली परिक्षेत्र) यांनी साम टीव्हीशी बाेलना नमूद केले.

नक्षलवाद्यांनी पुन्हा एकदा एटापल्ली तालुक्यातील सुरजागड लोहखनिज प्रकल्प आणि प्रस्तावित 6 नव्या लोह उत्खनन प्रकल्पांना विरोध केला आहे. सिपीआय माओवादी संघटनेचा पश्चिम सब झोनल ब्युरो गडचिरोलीचा प्रवक्ता श्रीनिवास याने यासंदर्भात पत्रक जारी केले आहे.

स्थानिक आमदार आणि नवनियुक्त मंत्री धर्मरावबाबा आत्राम यांनी सर्वच कॉर्पोरेट घराण्यांना पाठींबा दिला असल्याबद्दल संतापही व्यक्त केला आहे. आत्राम आणि त्यांच्या सहकाऱ्यांना आदिवासींचे जंगल - जमीन उध्वस्त केल्याची किंमत चुकवावी लागेल, असा इशाराही पत्राद्वारे दिला आहे.

आत्राम यांनी घराण्यांची दलाली चालविली असल्याचा आरोप करत महाराष्ट्र- छत्तीसगड सीमेवर तोडगट्टा येथे सुरू असलेले खाणविरोधी आंदोलन यशस्वी करण्याचे आवाहनही केले आहे.

दरम्यान सुरजागडसह गडचीरोली (gadchiroli) जिल्ह्यात सहा नविन खाणींना पाठिंबा दिल्यामुळे नक्षलवाद्यांनी मंत्री धर्मरावबाबा आत्राम यांना दिलेल्या धमकीनंतर गडचीरोली पोलीस विभाग सतर्क झाला आहे.

“मंत्री धर्मरावबाबा आत्राम यांना सध्या झेड सुरक्षा आहे. त्यांच्या सुरक्षेचा कुठलाही प्रश्न निर्माण होणार नाही. त्यामुळे नक्षलवाद्यांची (naxals) धमकीकडे लक्ष देण्याची गरज नाही.” असं गडचिरोली परीक्षेत्राचे विशेष पोलीस उपमहानिरिक्षक संदीप पाटील यांनी साम टीव्हीशी बाेलताना नमूद केले.

ते म्हणाले गडचीरोली जिल्ह्यात जी विकास कामं होत आहेत, त्या विकास कामांना नक्षलवाद्यांचा विरोध आहे. बंदूकीच्या जोरावर लोकांना एकत्र करुन आंदोलन (aandolan) केलं जातेय. तोडगट्टा गाव, नक्षलवाद्यांचा स्ट्रॅांग होल्ड असलेल्या या एन्ट्री पॅाईंटवर आंदोलन आहे. त्या भागात पोलीस वर्दळ वाढेल. म्हणून नक्षलवादी विकास कामांना विरोध करत आहे असंदी संदीप पाटील यांनी नमूद केले.

Edited By : Siddharth Latkar