संजय जाधव, साम टिव्ही

बुलडाणा : राज्यात स्वाईन फ्लूचा (Swine flu) प्रादुर्भाव झपाट्याने वाढत आहे. त्यामुळे नागरिकांनी काळजी घ्यावी असं आवाहन आरोग्य प्रशासन करीत आहे. अशातच बुलडाणा (Buldhana) जिल्ह्यातही स्वाईन फ्लूची एन्ट्री झाली आहे. बुलडाण्यात स्वाईन फ्लूचा पहिला रुग्ण आढळून आला आहे. शहरातील इकबाल चौकातील एक युवक पॉझिटिव्ह आढळून आला आहे. (Buldhana Latest News)

विशेष बाब म्हणजे पहिला कोरोना संसर्गीत रुग्ण देखील बुलडाणा शहरात मिळाला होता. आता स्वाईन फ्लू ग्रस्त सुद्धा शहरातील आहे. बुलडाणा शहरातील इकबाल चौकात राहणाऱ्या एका युवकाला (32 वर्षीय) स्वाईन फ्लूची लागण झाली आहे.

मागील 4 दिवसांपासून हा युवक येथील जिल्हा महिला रुग्णालयात भरती आहे. त्याचे लक्षणें पाहता दोन वेळा कोरोना टेस्ट करण्यात आली होती. मात्र, ही टेस्ट निगेटिव्ह आल्यामुळे त्याचा तपासणी अहवाल पुणे एन आय व्ही ला पाठविण्यात आला. (Buldhana Swine flu News)

दरम्यान, काल रात्री पुण्यावरून त्याचा अहवाल प्राप्त झाला. या अहवालात सदरील युवकाला स्वाईन फ्लूची लागण झाल्याचे स्पष्ट झालं आहे. सदरील युवक हा सुरूवातीला व्हेंटिलेटर्वर होता. पण आता तो स्थिर असल्याचे रुग्णालयीन सूत्रांनी कळविले आहे.

स्वाईन फ्लू हा कोरोनापेक्षाही अधिक गतीने संसर्ग होणारा आजार आहे. त्याच्या संपर्कात आलेल्या इतरांची टेस्ट केली जाणार असल्याचे आरोग्य विभागाने कळविले आहे.

Edited By - Satish Daud