रोहित कदम, साम प्रतिनिधी

एकीकडे जगात 'फादर्स डे' साजरा केला जात असताना दुसरीकडे अहिल्यानगरमधील अकोले तालुक्यात डोंगरगावमध्ये काळजाचा ठोका चुकवणारी घटना समोर आलीये. आपल्या चार वर्षांच्या चिमुकलीला बिबट्याच्या जबड्यातून सोडवण्यासाठी एका बापानं स्वतःच्या जीवाची पर्वा न करता बिबट्याशी दोन हात केलेत. रात्रीच्या सुमारास मनोज गुंजाळ यांच्या घराजवळ दबा धरून बसलेल्या बिबट्यानं अचानक झडप घातली. आईच्या पाठीवर असलेल्या अवनीला बिबट्यानं तोंडात पकडून अंधाराच्या दिशेने ओढत नेण्यास सुरुवात केली.

मुली आणि आईचा आक्रोश ऐकताच वडील मनोज गुंजाळ यांनी क्षणाचाही विलंब न करता बिबट्याच्या दिशेने धाव घेतली. आणि स्वतःच्या जीवाची पर्वा न करता बिबट्याशी झुंज देत अवनीची सुटका केली. मात्र, मुलीला कडेवर घेऊन घराच्या दिशेने धावत असताना अंधारामुळे समोरील विहीर न दिसल्यानं बाप-लेक दोघेही थेट विहिरीत कोसळले. ग्रामस्थांनी धाव घेत दोघांनाही विहिरीतून बाहेर काढलं.

बिबट्याच्या हल्ल्यातून बचावलेल्या बाप आणि लेकीवर संगमनेर येथील रुग्णालयात उपचार सुरू आहेत. मात्र, घटनेनं बिबट्यांच्या मानवी वस्तीतील मुक्त संचाराचा प्रश्न पुन्हा ऐरणीवर आलाय. विशेष म्हणजे, गेल्याच महिन्यात जुन्नरच्या शिरोली गावामध्येही बिबट्याशी झुंज देत एका बापानं आपल्या मुलाची मृत्यूच्या दारातून सुटका केली होती. मात्र, आज वडिलांच्या प्रसंगावधानामुळे एका चिमुरडीचे प्राण वाचलेत.

मुलीसाठी काळ बनून आलेल्या बिबट्याला भिडणाऱ्या या 'बाप'माणसाची सध्या चांगलीच चर्चा रंगलीये. मात्र अहिल्यानगरसह नाशिक, पुणे जिल्ह्यात बिबट्यांच्या हल्ल्यांनी ग्रामीण भागात दहशत निर्माण झाली आहे. अशा स्थितीत वनविभागाचा ढिम्मं कारभार चिड आणणारा आहे. बिबट्याला पळवून लावणारी अशी 'बाप' माणसे काही गावात असली तरी या समस्येवर ठोस उपाय कधी काढणार? हाच खरा प्रश्न आहे.