विजेचा शॉक लागून बाप-लेकाचा जागीच मृत्यू झाल्याची घटना बुलढाणा जिल्ह्यातील मुरादपुर येथे घडली. शेतातील लोंबकळलेल्या विद्युत् तारांना स्पर्श झाल्याने ही दुर्देवी घटना घडल्याची प्राथमिक माहिती मिळाली आहे.

चिखली तालुक्यातील मेरा बुद्रुक येथील रामेश्वर उत्तम पडघान (वय 45) आणि त्यांचा मुलगा वैभव (वय 22) हे मुरादपुर येथील गाडेकर यांच्या गावालगत असलेल्या शेतात काम करत होते. परंतु अचानक त्यांचा स्पर्श शेतात लोंबकळलेल्या वीज तारेला झाला.

त्यानंतर दाेघेही जमिनीवर पडले. त्यांचा विद्युत शॉक लागल्याने जागीच मृत्यू झाला. या घटनेची माहिती स्थानिकांकडून तात्काळ पोलिसांना देण्यात आली. पाेलिस आणि विद्यु विभाग या दोन्ही विभागाच्या अधिकाऱ्यांनी तात्काळ घटनास्थळी धाव घेतली. दाेन्ही विभागातील कर्मचा-यांनी पंचासमक्ष पंचनामा केला आहे. या घटनेत बाप-लेकाचा मृत्यू झाल्याने परिसरात हळहळ व्यक्त करण्यात येत आहे.

Edited By : Siddharth Latkar