भूषण आहीरे, साम टीव्ही

धुळे: राज्यभर गाजत असलेल्या बनावट शालार्थ आयडी प्रकरणात मोठी कारवाई करण्यात आली असून या प्रकरणातील संशयित आरोपी प्रशांत वाडीले याला धुळे येथून अटक करण्यात अली आहे. नाशिक आर्थिक गुन्हे शाखेच्या पथकाने ही कारवाई केली असून आज वाडीले याला धुळे न्यायालयात हजर करण्यात आले.

अटकेनंतर नाशिकच्या पथकाने प्रशांत वाडीले यांच्या धुळ्यातील निवसस्थानावर झाडाझडतीही घेतली. या झाडाझडतीतून महत्वाची कागदपत्रे आणि पुरावे हाती लागण्याची शक्यता असून या तपासातून आणखी धक्कादायक माहिती समोर येण्याची शक्यता वर्तवली जात आहे.

दरम्यान या प्रकरणातील मुख्य फिर्यादी पंकज साळुंखे यांनी गंभीर आरोप करत आणखी काही संस्थाचालक आर्थिक गुन्हा शाखेच्या रडारवर असल्याचे सांगितले आहे. त्यांनी दावा केला की, प्रशांत वाडीले यांच्या नावावर तब्बल 65 शाळा दाखवण्यात आल्या असून, त्यापैकी 63 शाळा बनावट असल्याचा संशय आहे. केवळ शिंदखेडा आणि साक्री येथे दोनच शाळा प्रत्यक्षात सुरू असल्याही माहिती त्यांनी दिली.

याचबरोबर, या संपूर्ण प्रकरणाची आतापर्यंत झालेली चौकशी रद्द करून न्यायाधीशांमार्फत स्वतंत्र चौकशी करण्यात यावी, अशी मागणीही पंकज साळुंखे यांनी केली आहे. प्रशांत वाडीले याच्या अटकेनंतर या बहुचर्चित प्रकरणाच्या तपासाला आणखी वेग येणार असल्याचे मानले जात असून, आगामी काळात आणखी मोठे खुलासे होण्याची शक्यता व्यक्त केली जात आहे.