लातूर : 'सध्या मी राजकारणावर आणि राजकीय परिस्थितीवर लक्ष न ठेवता फक्त स्वराज्य संघटना कशी मजबूत होईल याकडे लक्ष देत आहे. मराठा समाजाच्या आरक्षणाचा लढा हा दीर्घकालीन आणि सातत्याने सुरूच राहणार आहे, असे माजी खासदार संभाजीराजे छत्रपती भोसले (Sambhaji Raje Bhosale) यांनी स्पष्ट केले. (Sambhaji Raje Bhosale News)

गोसावी समाजाच्या त्रिसूत्री महाअधिवेशनासाठी माजी खासदार संभाजीराजे छत्रपती हे लातूरमध्ये आले होते. यावेळी त्यांनी माध्यमांशी संवाद साधला. राज्यात मराठा समाजाला आरक्षण केव्हा मिळणार याकडे साऱ्याचं लक्ष लागलं आहे. मराठा आरक्षणावरून खासदार संभाजीराजे छत्रपती यांनी भूमिका स्पष्ट केली आहे.

'मुख्यमंत्री एकनाथ शिंदे हे मराठा समाजावर प्रेम करतात. त्यांनी मराठा समाजाला टिकणारं आरक्षण द्यावे, अशी मागणी संभाजीराजे छत्रपती यांनी मुख्यमंत्र्याकडे केली आहे. संभाजीराजे छत्रपती यांच्या मराठा आरक्षणाच्या मागणीनंतर साऱ्यांचे लक्ष आरक्षणावर लागले आहे. त्यामुळे मुख्यमंत्री एकनाथ शिंदे यांच्याकडून मराठा आरक्षणावर काय भूमिका घेतली जाते, हे पाहावे लागणार आहे.

'सध्याच्या राजकीय परिस्थितीवर माझं लक्ष नाही . मराठा आरक्षणासोबत आणासाहेब पाटील महामंडळ, सारथी सारखे मराठा समाजाच्या मुलभूत प्रश्न शिंदे-फडणवीस सरकारने तत्काळ सोडवावी. अतिवृष्टीने नुकसान झालेल्या शेतकऱ्यांना केवळ मदत सरकारने जाहीर केली आहे. पण अद्याप शेतकऱ्यांना मदत मिळाली नाही. ती कृषी मंत्र्यांनी त्यांच्या दौऱ्यात पाहावं. सरकारने शेतकऱ्यांना लवकरात लवकर मदत द्यावी, असे माजी खासदार संभाजीराजे छत्रपती म्हणाले.