29 महापालिकांचा शुक्रवारी निकाल लागला आणि 25 महापालिकांमध्ये भाजपने अभूतपूर्व यश मिळवले. तर पुणे आणि पिंपरीचिंचवडमध्ये अजित पवारांच्या राष्ट्रवादीचा दारुण पराभव झाला. या ठिकाणी भाजप ही स्वतंत्र निवडणूक लढवत होती. केंद्रीय राज्यमंत्री मुरलीधर मोहोळ, भाजप आमदार महेश लांडगे विरुद्ध अजित पवार असा संघर्ष होता. मात्र भाजपने मुसंडी मारत राष्ट्रवादीला घरचा रस्ता दाखवला.

तर अनेक उमेदवारांनी निवडणूक आयोगाच्या कारभारावर प्रश्न उपस्थित केले आहे. काही ठिकाणी ईव्हीएमवर आक्षेप घेण्यात आला. यावरच आता अजित पवार गटाचे आणि महायुतीचे आमदार अमोल मिटकरी यांनी देखील संशय व्यक्त करत निवडणूक बॅलेट पेपरवर घ्यावी अशी मागणी केली आहे. काल लागलेल्या महापालिका निवडणूक निकालांत अजित पवारांच्या राष्ट्रवादीला अहिल्यानगर वगळता पुणे, पिंपरी चिंचवडमध्ये दादांच्या राष्ट्रवादीचं मोठं पानीपत झालंय. या पराभवानंतर राष्ट्रवादीचे आमदार मिटकरींनी आता मोठी मागणी केलीये. राज्यातील यापुढच्या सर्व निवडणुका बॅलेट पेपर'वर घेण्याची मागणी केलीये. सरकार आणि निवडणूक आयोगाला आपल्यावरचा विश्वास कायम ठेवायचा असेल तर हा निर्णय घ्यावा लागणार असल्याचं ते म्हणालेत.

आमदार मिटकरींनी 'बॅलेट'वर मतदान घेण्याची मागणी करत विरोधकांच्या सुरात सुर मिळवलाय. पुणे आणि पिंपरी चिंचवडमध्ये काम करूनही आमच्या पक्षाचा पराभव कसा होऊ शकतो? असा सवाल त्यांनी केलाय. इव्हीएमचा फायदा काही ठराविक पक्षांनाच कसा होतो? असा सवाल त्यांनी केलाय.

दरम्यान, आज दोन्ही राष्ट्रवादीच्या वरिष्ठ नेत्यांची झालेली बैठक हा दैनंदिन प्रक्रियेचा भाग असल्याचं ते म्हणालेत. दोन्ही पक्ष एकत्र येण्याचा निर्णय शरद पवार आणि अजित पवार घेतील असं ते म्हणालेत. दरम्यान, कुटुंब म्हणून पवार कुटुंबिय हे कायमच एक असल्याचं ते म्हणालेत.