मालवण नगरपरिषदेच्या निवडणुकीत खासदार निलेश राणेंनी भाजपवर पैसे वाटपाच्या आरोपांचा धडकाच लावला..तो अगदी मतदानाच्या दिवसापर्यंत..साहजिकच ही निवडणुक पैश्यांमुळे गाजली. ठाकरेसेनाही मालवणमधील पैसे वाटपावरून आक्रमक झाली.खासदार संजय राऊतांनी पोस्ट करत.. 'मालवणमध्ये शिंदेंनी बँगेतून काय आणलं?' असा सवाल उपस्थित करत 'लोकशाहीची ऐशी की तैशी' असं म्हटलंय. तर दुसरीकडे ठाकरेसेनेचे माजी आमदार वैभव नाईकांनीही शिंदेंनी मतदारांना वाटण्यासाठीच पैसे आणले, असा आरोप केलाय...

दरम्यान वैभव नाईकांच्या या आरोपावर शिंदेसेनेही पलटवार केलाय...प्रचारासाठी घराबाहेर पडणाऱ्यांच्या हातात बॅगा दिसतात, असा टोला उदय सामंतांनी लगावला.

विधानसभा निवडणुकीतही राऊतांनी एकनाथ शिंदेंवर हेलिकॉप्टरमधून नाशिकला पैसे नेल्याचा आरोप केला होता. तेव्हाही बॅग तपासण्यावरून उद्धव ठाकरेंनी निवडणुक आयोगाच्या अधिकाऱ्यांना सुनावलं होतं. आता पुन्हा एकदा शिंदेंची बॅग चर्चेत आली आहे. कोकणातील निवडणूक विकास कामांऐवजी रुपय्याच वरचढ ठरलाय.