संजय गडदे, साम टीव्ही

Eknath Shinde on Sanjay Gaikwad : मुंबईतील आकाशवाणी आमदार निवासातील जेवणामुळे शिंदे गटाचे आमदार संजय गायकवाड यांनी कॅन्टीनमधील कर्मचाऱ्याला केलेल्या मारहाणीमुळे खळबळ उडाली आहे. शिळे जेवण दिल्यामुळे गायकवाड यांनी केलेल्या मारहाणीचा व्हिडिओ सोशल मीडियार व्हायरल होत आहे. संजय गायकवाड यांच्या कृत्यानंतर संपूर्ण महाराष्ट्रात टीकेची झोड उठली आहे. मुख्यमंत्री देवेंद्र फडणवीस यांनीही त्यांच्या मारहाणीचं समर्थन केलेलं नाही. तर आता एकनाथ शिंदे यांनीही त्यांचं कृत्य योग्य नसल्याचं म्हटलं आहे.

संजय गायकवाड यांनी कॅन्टीनमधील कर्मचाऱ्याला मारहाण केल्यानंतर विरोधकांनीही टीकेची झोड उठवली आहे. तर महायुतीच्या प्रमुख नेत्यांनीही त्यांची कृती योग्य नसल्याचं म्हटलं आहे. शिवसेना आमदार संजय गायकवाड यांनी केलेल्या मारहाणीवर उपमुख्यमंत्री एकनाथ शिंदे म्हणाले, आमदार निवासातील कॅन्टीनमधील निकृष्ट दर्जाचे जेवण त्यामुळे आमदारांनाच नाही, तर सामान्य नागरिकांना त्रास होऊ शकतो. ते जेवण खाल्ल्यामुळे त्यांना उलटी झाली. संजय गायकवाड यांनी रागाच्या भरात मारहाण केली. पण आपल्याकडे कायदेशीर कारवाई करण्याचे अधिकार आहेत. कोणालाही मारहाण करणे योग्य नाही. मी संजय गायकवाड यांना समज दिली आहे'.

'शेतकऱ्यांच्या आत्महत्या किंवा इतर प्रश्नांवर बोलण्यासाठी अधिवेशनात संधी असते. मात्र विरोधक पायऱ्यांवर बसून कॅमेऱ्यावर बोलण्यात महत्त्व देतात, असे ते म्हणाले.

'मराठी सक्ती करण्याचं काम सरकारने केलं आहे. अभिजात भाषेचा दर्जा देण्याचे काम देखील आमच्या सरकारने केले. आमच्या सरकारने मराठी भाषेसाठी काय केले, मराठी माणसाला माहीत आहे. मागील अनेक वर्ष ते सत्तेत आहेत, मग मराठी माणूस मुंबईबाहेर का फेकला गेला, असा सवाल एकनाथ शिंदे केला.