MLA Pratap Sarnaik Fraud: मुख्यमंत्री एकनाथ शिंदे यांच्या गटातील आमदार प्रताप सरनाईक यांची कोट्यवधी रुपयांची फसवणूक झाल्याचा प्रकार समोर आला आहे. जमीन व्यवहारात आमदार प्रताप सरनाईक यांची तब्बल ७ कोटी ६६ लाख रुपयांची फसवणूक झाल्याची तक्रार पोलिसांत (Police) दाखल झाली आहे.

सरनाईक यांच्या स्वीय सहाय्यकाने दिलेल्या तक्रारीनुसार काशीमीरा पोलिस ठाण्यात गुन्हा दाखल (Crime News) करण्यात आला आहे. या घटनेनं खळबळ उडाली आहे. मिळालेल्या माहितीनुसार, आमदार प्रताप सरनाईक यांना घोडबंदर येथे जमीन खरेदी करायची होती.

यासाठी त्यांनी काही दिवसांपूर्वी एका मार्टीन बर्नार्डो या कोरियन व्यक्तीला संपर्क केला होता. प्रताप सरनाईक यांनी जमीनीच्या व्यवहारासाठी पहिल्या टप्प्यात साडेतीन कोटी रूपये दिले. मात्र, त्या व्यक्तीन जमीन नावावर केली नाही.

यानंतर त्याने घेतलेले पैसे देखील परत केले नाही. दरम्यान, २०२१ पासून या व्यवहारासाठी प्रताप सरनाईक प्रयत्न करत आहेत. संबंधीत आरोपीने टाळाटाळ केली. यानंतर सरनाईक यांनी अखेर त्यांच्या एका व्यक्तीच्या माध्यमातून पोलिसांत तक्रार दिली.

आता या प्रकरणात अखेर गुन्हा दाखल करण्यात आला आहे. आरोपीवर फसवणूक संबंधीत गुन्हा दाखल करण्यात आला आहे तसेच आर्थिक गुन्हे शाखेकडे देखील या प्रकरणात तक्रार करण्यात आली आहे. आमदार प्रताप सरनाईक यांची तब्बल ७ कोटी रुपयांची फसवणूक झाल्याचं समोर येताच परिसरात मोठी खळबळ उडाली आहे.

Edited by - Satish Daud