बेकायदेशीर सहलीचे आयोजन करून विद्यार्थ्यांच्या जीवाशी खेळणाऱ्या शिक्षण विभागाचा आणखी एक मोठा घोटाळा समोर आलेला आहे. शिक्षण विभागाने टेंडर प्रक्रियेत शॉर्टकट मारून 5 कोटी रुपयांची निविदा काढली आहे. या निविदा प्रक्रियेतील अनियमितता आणि धोरणांच्या उल्लंघनामुळे उच्चस्तरीय चौकशीची मागणी केली जात आहे.

नवी मुंबई मनपाच्या सर्व शाळांमध्ये सोलार ऑपरेटेड रोबोटिक कोडिंग आणि आर्टिफिशीअल इंटेलिजन्स प्रयोगशाळा उभारण्यासाठी राज्य सरकारने 4 कोटी 99 लाख रुपयांचा निधी दिला आहे. जिल्हाधिकारी कार्यालयाकडून हा निधी पालिकेकडे हस्तांतरित केल्यानंतर निविदा प्रक्रिया सुरु करण्यात आली.

परंतु, नियमानुसार शहर अभियंता आयटी विभाग, कार्यकारी अभियंता आयटी विभाग, लेखा अधिकारी आणि सल्लागार यांचा अभिप्राय घेणे आवश्यक असताना, हे सर्व पायऱ्या पूर्ण न करता निविदा प्रक्रिया सुरु केली गेली. यामुळे या प्रक्रियेमध्ये मोठा घोटाळा झाल्याचा आरोप सामाजिक कार्यकर्ते अभयचंद्र सावंत यांनी केला आहे.

सामाजिक कार्यकर्ते अभयचंद्र सावंत यांनी एक खाजगी संस्थेच्या शिक्षण विभागाच्या पांरपरिक निविदा प्रक्रियेतील संभाव्य गैरव्यवहाराबद्दल उच्चस्तरीय चौकशी करण्याची मागणी केली आहे. त्यांचे म्हणणे आहे की, अभियांत्रिकी विभाग, लेखा विभाग आणि सल्लागार यांचा अभिप्राय न घेता संबंधित काम संबंधित संस्थेच्या घशात घातले गेले आहे. जरी अन्य कामांच्या निविदेमध्ये संबंधित विभागांचा किंवा अधिकाऱ्यांचा अभिप्राय घेतला जातो, तरी या प्रकरणात ती प्रक्रिया चुकीच्या पद्धतीने पार पडली आणि यामुळे संशयाचे वातावरण निर्माण झाले आहे.

Edited By - Purva Palande