अविनाश कानडजे

औरंगाबाद - गौणखनिजांची चोरी रोखण्यासाठी आता ड्रोनची नजर असणार आहे. त्यामुळे आता वाळू माफियांचे धाबे दणाणणार हे नक्की. औरंगाबाद (Aurangabad) जिल्ह्यातील गंगापूर, वैजापूर आणि पैठण (Paithan) परीसरात गोदावरी नदीच्या काठावर मोठ्याप्रमाणात अवैध वाळू उपसा केला जातो. तर, काही भागात मुरूम, मातीसह गौणखनिजाची तस्करी सुरु होती. क्षेत्र मोठं असल्याने बऱ्याच वेळा महसूल पथकाला वाळू आणि गौणखनिज उत्खनन कुठे सुरू आहे याचा अंदाज येत नाही. (Aurangabad Latest News)

हे देखील पहा -

त्यामुळे आता ड्रोनच्या माध्यमातून आशा वाळू आणि गौणखनिज तस्करांवर नजर ठेवली जाणार आहे. बऱ्याचवेळा महसूल किंवा पोलीस पथक कारवाईसाठी आल्याची भनक लागल्याने हे माफिया पळून जातात, तसेच नंतर त्यांची ओळख पटवणे सुद्धा अवघड जाते. मात्र आता थेट ड्रोनच्या माध्यमातून वाळू तस्कर कॅमेऱ्यामध्ये कैद होतील.

त्यामुळे पळून गेल्यानंतरही तस्करांची ओळख पटल्याने त्यांच्यावर पुरावांच्या आधारे कारवाई करता येणार आहे. या ड्रोनचा सर्वाधिक फायदा अवैध वाळू उपसा रोखण्यासाठी होणार आहे. कारण बऱ्याचवेळा पथक कारवाईसाठी आल्याची माहिती लोकेशनवर असलेल्या फंटरकडून माफियांना मिळून जाते. मात्र आता एका जागेवर थांबवून महसूल पथक ड्रोनच्या माध्यमातून अनेक भागावर लक्ष ठेवणार असल्याने वाळू माफिया आणि गौनखनिज चोरणाऱ्यांचे थाबे दणाणले आहे.

Edited By - Shivani Tichkule