अभिजीत देशमुख, साम टीव्ही

डोंबिवली : 65 बेकायदा इमारत बांधकाम प्रकरणात बनावट सातबारा,बनावट एन ए प्रकरणी तहसीलदारांच्या आदेशानंतर रामनगर पोलीस ठाण्यात साई गॅलेक्सी इमारतीचे बिल्डर शालीन भगत यांच्या विरोधात गुन्हा दाखल करण्यात आला होता. या शालेय भगतचा अटकपूर्व जामीन अर्ज न्यायालयाने फेटाळल्याची माहिती ठाकरे गटाचे जिल्हाप्रमुख दीपेश म्हात्रे यांनी दिली. याबाबत म्हात्रे यांनी डीसीपी पराग मनेरे यांची भेट घेत शालीन भगत हा प्यादा आहे,त्याच्या मागचा प्रमुख आरोपी अटक झाली पाहिजे, अशी मागणी केल्याचे सांगितले.

६५ बेकायदा बांधकाम प्रकरणात संबंधित बिल्डरने खोटे कागदपत्र तयार करणाऱ्या टोळीवर एमपीडीए कारवाई होणार असल्याची माहिती शिवसेना ठाकरे गटाचे जिल्हा प्रमुख दीपेश म्हात्रे यांनी दिली आहे.

६५ बेकायदा बेकायदा इमारती तोडण्याचे आदेश उच्च न्यायालयाने कल्याण डोंबिवली महापालिका प्रशासनास दिले आहे. या इमारतीत घरे घेणाऱ्या रहिवाशांवर कारवाईची टांगती तलवार आहे. या रहिवासीयांची घरे वाचविण्यासाठी शिवसेना ठाकरे गटाने पुढाकार घेतला आहे. या प्रकरणात ठाकरे गटाचे जिल्हा प्रमुख यांनी पोलीस आयुक्त आशूतोष डुंबरे, पोलिस उपायुक्त अतुल झेंडे, कल्याणचे प्रांत अधिकारी विश्वास गुजर यांची भेट घेऊन या प्रकरणातील दोषींच्या विरोधात कारवाई करण्याची मागणी केली.

प्रांत अधिकारी गुजर यांनी या प्रकरणात खोटे कागदपत्रे तयार करणाऱ्यांची चौकशी करण्याचे आदेश कल्याणचे तहसीलदार सचिन शेजाळ यांना दिले होते. तहसीलदार शेजाळ यांनी खोटे कागदपत्रे तयार करणारे साई डेव्हलर्पचे भागीदार शालीक भगत यांच्या विरोधात गुन्हा दाखल करण्याचे आदेश रामनगर पोलिसांना दिले होते. या प्रकरणात पोलिसांनी भगत याच्या विरोधात गुन्हा दाखल केला. हा गुन्हा ठाणे आर्थिक गुन्हे शाखेकडे वर्ग करण्यात आला आहे. या प्रकरणी आर्थिक गुन्हे शाखेने कागदपत्रांची चौकशी तपासणी सूरु केली आहे.या दरम्यान भगत याने अटकपूर्व जामीनासाठी न्यायालयात अर्ज केला होता. न्यायालयाने हा अर्ज फेटाळून लावला आहे.

ठाकरे गटाचे जिल्हा प्रमुख म्हात्रे यांनी काल सायंकाळी आर्थिक गुन्हे शाखेचे अधिकारी पराग मणेरे यांची भेट घेतली. खोटे कागदपत्रे प्रकरणी चौकशी करुन कारवाई करण्याची मागणी केली आहे. यावेळी मणेरे यांनी ६५ बेकायदा बांधकाम प्रकरणात संबंधित बिल्डरानी खोटे कागदपत्र तयार करणाऱ्या टोळीवर एमपीडीए केली जाईल असे आश्वासन दिल्याचे म्हात्रे यांनी सांगितले.