अभिजित देशमुख 
डोंबिवली : डोंबिवली एमआयडीसीतील कंपनीत काम करणाऱ्या महिलेला मॅनेजर कडून मारहाण करण्यात आल्याचा धक्कादायक प्रकार समोर आला आहे. एमआयडीसीतील एम्ब्रोडरीज कंपनीत अधिक काम मागितल्याने कंपनी मॅनेजरने महिला कामगारासोबत उद्धट वर्तन करत लाथाबुक्क्यांनी बेदम मारहाण केली आहे. याप्रकरणी मानपाडा पोलिसांनी मॅनेजरसह मुकादमाला ताब्यात घेतले आहे. 

डोंबिवली एमआयडीसीतील एम्ब्रोडरीज कंपनीत काम करणाऱ्या ज्योती खैर या महिलेने दिलेले काम वेळेत पूर्ण केले. यानंतर सदर महिलेला अधिक काम द्यावे; अशी मागणी एम्ब्रोडरीज कंपनीच्या मॅनेजरकडे ५ मार्चला सायंकाळी महिलेने केली. या वेळी कंपनीचा मॅनेजर रणजित आगवले महिलेशी उद्धटपणे बोलू लागला. मात्र मॅनेजरला महिलेने प्रतिउत्तर दिल्याने संतपलेल्या मॅनेजरने महिलेला लाथाबुक्क्यांनी बेदम मारहाण केली.

मारहाणीत महिला जखमी 

यावेळी त्या ठिकाणी उपस्थित इतर महिला कामगार आणि कर्मचाऱ्यांनी मध्यस्थी करत वाद थांबवला. मात्र या मारहाणीत ज्योती खैर या जखमी झाल्या असून सध्या या महिलेवर डोंबिवलीच्या शास्त्रीनगर रुग्णालयात उपचार सुरू आहेत. दरम्यान या घटनेची माहिती मिळताच भाजप महिला पदाधिकाऱ्यांनी कंपनी मॅनेजरला जाब विचारत संबंधित मानपाडा पोलिसांना या घटनेची माहिती दिली. 

मॅनेजरसह एकजण ताब्यात 

सदर प्रकरणी मानपाडा पोलिसांत तक्रार दाखल करण्यात आल्यानंतर पोलिसांनी अधिक चौकशी केली. यानंतर महिलेला मारहाण करणारा मॅनेजर रणजित आगवले याच्यासह त्याचा साथीदार असलेला मुकादम विजय सेंडल या दोघांविरोधात गुन्हा दाखल केला आहे. तसेच पोलिसांनी या दोघांनाही बेड्या ठोकल्या आहेत.