सोलापूरमधील नामवंत न्यूरोलॉजिस्ट डॉ. शिरिष पद्माकर वळसंगकर यांच्या आत्महत्येप्रकरणी मोठी अपडेट समोर आली आहे. डॉ. वळसंगकर यांना आत्महत्येस प्रवृत्त केल्याप्रकरणी एका महिलेविरोधात गुन्हा दाखल करण्यात आला आहे. आत्महत्या करण्यापूर्वी डॉ. वळसंगकर यांनी एक चिठ्ठी लिहीली होती. या चिठ्ठीत त्यांनी मनीषा मुसळे- माने या महिलेचं नाव लिहिलं होतं. तसेच या महिलेमुळे टोकाचे पाऊल उचलत असल्याचा आरोप त्यांनी केला आहे. सुसाईड नोट सापडल्यानंतर पोलिसांनी तातडीने मनीषा मुसळे- माने या महिलेविरोधात गुन्हा दाखल करत अटक केली आहे.

आरोपी मनीषा मुसळे-माने या हॉस्पिटलमध्येच प्रशासकीय अधिकारी म्हणून कार्यरत होत्या. सूत्रांनी दिलेल्या माहितीनुसार, आत्महत्या करण्यापूर्वी डॉ. वळसंगकर यांनी एक चिठ्ठी लिहून ठेवली होती. या सुसाईड नोटमध्ये त्यांनी स्पष्टपणे मनीषा मुसळे- माने हिच्यामुळेच हे टोकाचे पाऊल उचलत असल्याचे नमूद केलं. ही चिठ्ठी पोलिसांच्या हाती लागल्यानंतर त्यांनी तातडीने कारवाईला सुरूवात केली.

रात्री १० वाजेच्या सुमारास पोलिसांनी आरोपी महिलेविरोधात गुन्हा दाखल केला. तसेच न्यायालयाची परवानगी घेऊन आरोपी महिलेला अटक करण्यात आल्याची माहिती समोर आली आहे. सध्या पोलीस या घटनेचा अधिक तपास करीत असून, ही आत्महत्या आहे, की यामागे आणखी मोठी गोष्ट लपलेली आहे? याचा छडा लावण्याचं काम पोलिसांकडून सुरू आहे.

सोलापुरात शोककळा आणि संताप

सोलापूरमधील वैद्यकीय क्षेत्रात डॉ. शिरीष पद्माकर वळसंगकर यांचं मोठं नाव होतं. हे सोलापुरातील अत्यंत लोकप्रिय न्यूरोलॉजिस्ट असून, त्यांच्या अचानक जाण्याने शहरात हळहळ व्यक्त होत आहे.