धुळे/ यवतमाळ : कृषिमंत्री माणिकराव कोकाटे यांनी शेतकऱ्यांबद्दल अपमानकारक वक्तव्य केल्याचा आरोप शेतकऱ्यांकडून करण्यात आला आहे. कोकाटे यांनी केलेल्या विधानाचे पडसाद ठिकठिकाणी उमटत असून धुळे व यवतमाळमध्ये कोकाटे यांच्या विरोधात आंदोलन करण्यात आले. यात शिवसेना ठाकरे गटाकडून जोडे मारो आंदोलन तर यवतमाळमध्ये कृषी मंत्र्यांचा पुतळा फासावर लटकवण्यात आला.  

कृषी मंत्री माणिकराव कोकाटे यांनी केलेल्या वक्तव्याचे पडसाद धुळ्यात देखील उमटताना दिसून आले आहेत. कृषिमंत्री माणिकराव कोकाटे यांच्या वक्तव्याविरोधात धुळ्यात ठाकरे गट शिवसैनिक आक्रमक झाल्याचे दिसून आले असून या ठिकाणी झाशी राणी पुतळा परिसरामध्ये कृषी मंत्री माणिकराव कोकाटे यांच्या प्रतिमेस जोडे मारून शिवसेनेच्या वतीने निषेध आंदोलन करण्यात आले आहे. 

कोकाटेंचा तात्काळ राजीनामा घ्या  

कृषी मंत्री माणिकराव कोकाटे यांच्या विरोधात तीव्र घोषणाबाजी करत ठाकरे गट शिवसेनेचे पदाधिकारी चांगलेच आक्रमक झाल्याचे दिसून आले. यावेळी मुख्यमंत्र्यांनी कृषिमंत्री माणिकराव कोकाटे यांचा तात्काळ राजीनामा घ्यावा; अशी मागणी देखील ठाकरे शिवसेनेच्या उपनेत्या शुभांगी पाटील यांच्या वतीने करण्यात आली आहे.

यवतमाळात ठाकरे गटाचे कार्यकर्ते उतरले रस्त्यावर
यवतमाळ : शेतकऱ्यांबाबत असंवेदनशील आणि अपमानजनक वक्तव्य केल्याचा आरोप कृषीमंत्री माणिकराव कोकाटे यांच्यावर करित यवतमाळमध्ये शिवसेना ठाकरे गट आक्रमक झाल्याचा पाहायला मिळाले. शेतकऱ्यांबद्दल केलेल्या त्यांच्या वादग्रस्त वक्तव्यामुळे संतापलेले ठाकरे गटाचे कार्यकर्ते रस्त्यावर उतरले. भर चौकात कृषी मंत्र्याचा पुतळा फासावर लटकवून जोरदार आंदोलन करण्यात आले. आंदोलकांनी कृषीमंत्री माणिकराव कोकाटे यांच्या विरोधात तीव्र आंदोलन छेडलं. मुख्यमंत्र्यांनी कृषीमंत्र्याचा तात्काळ राजीनामा घ्यावा, अशी मागणी यावेळी करण्यात आली.