धुळे : धुळ्यातील शासकीय रेस्ट हाऊस प्रकरणासंदर्भात पोलीस प्रशासनाच्या कार्यप्रणालीवर माजी आमदार तथा शिवसेना ठाकरे गटाचे नेते अनिल गोटे यांनी असमाधान व्यक्त केले होते. दरम्यान त्यांनी या प्रकरणासंदर्भात कठोर गुन्हे दाखल करण्याबाबत कोर्टामध्ये दाद मागितली होती. यावर सुनावणी होत न्यायालयाने आज यासंदर्भात कलम 174, 173, 210 ब, 175 (३) अंतर्गत गुन्हे दाखल करून तपास करण्याचे निर्देश दिले आहेत. 

धुळ्यातील शासकीय विश्रामगृहातील रूम नंबर १०२ मध्ये तब्बल १ कोटी ८४ लाख ८४ हजार २०० रुपयांची रोख रक्कम आढळून आली आहे. सदरचे प्रकरण सध्या गाजत असून माजी आमदार अनिल गोटे यांनी या प्रकरणात पोलिसांच्या तपासाबाबत देखील ताशेरे ओढत आरोप केले होते. यानंतर देखील अनिल गोटे यांनी सदरचे प्रकरण लावून धरले असून कोर्टात याचिका दाखल केली होती.

२१ मे २०२५ च्या मध्यरात्री धुळे शासकीय रेस्ट हाऊस गुलमोहर येथील खोली नंबर १०२ मध्ये एक कोटी ८४ लाख ८४ हजार रुपयांची रोकड पोलिसांना आढळून आली होती. या प्रकरणात माजी आमदार तथा शिवसेना नेते अनिल गोटे यांनी हे प्रकरण उचलून धरलेले असून पोलिसांच्या कार्यप्रणालीवर गोटे यांनी प्रश्नचिन्ह उपस्थित करत हे प्रकरण दडपण्याचा प्रयत्न पोलीस प्रशासनातर्फे सुरू असल्याचा आरोप करीत न्यायालयामध्ये या संदर्भात याचिका दाखल केलेली होती.

तर पोलिसांना सह आरोपी करण्याची मागणी 

या संदर्भात न्यायालयाने दिलेल्या आदेशाचे तात्काळ पालन करण्यात यावे; अशी मागणी देखील गोटे यांनी केली आहे. तसेच पुढील पंधरा दिवसांच्या आत पोलिसांनी न्यायालयाचे आदेश पाळत पुढील कारवाई न केल्यास संबंधित पोलीस अधिकाऱ्यांना देखील या प्रकरणात सह आरोपी करणार असल्याची मागणी न्यायालयात आपण करणार असल्याचे गोटे यांनी स्पष्ट केले आहे.