धुळे : धुळे शहर व परिसरात मागील आठवड्यात जोरदार पाऊस झाला. यामुळे अक्कलपाडा धरण पूर्णपणे भरले असून या द्वारे पाण्याचा विसर्ग करण्यात येत होता. दरम्यान लोंढाणाला प्रकल्पात अक्कलपाडा धरणाचे पाणी सोडण्यात यावे या मागणीसाठी नेर परिसरातील ग्रामस्थांनी रास्ता रोको आंदोलन केले. 

धुळे (Dhule) तालुक्यातील नेर परिसरातील ग्रामस्थांनी आज रास्ता रोको करून प्रशासनाकडे लोंढाणाला प्रकल्प अक्कलपाडा धरणाच्या (Akkalpada Dam) उजव्या कालव्याच्या माध्यमातून पाणी सोडून भरण्याची मागणी केली आहे. यापूर्वी देखील प्रशासनाकडे ग्रामस्थांनी वारंवार निवेदन देऊन देखील मागणी केली होती. परंतु प्रशासनाचे याकडे दुर्लक्ष होत असल्याचे निदर्शनास आल्यानंतर अखेर ग्रामस्थांनी रास्ता रोको करून आपला निषेध व्यक्त केला आहे, 

ग्रामस्थांनी केलेल्या रास्ता रोको आंदोलन दरम्यान मोठ्या प्रमाणात वाहतूक कोंडी झाल्याचे देखील बघावयास मिळाले. महामार्गावर वाहनांच्या लांबच लांब रांगा लागल्याने वाहतुकीचा प्रश्न निर्माण झाला होता. प्रशासनाला या संदर्भातील निवेदन देखील देण्यात आले असून या रास्ता रोकोनंतर जर प्रशासनाने त्यांच्या मागणीकडे लक्ष दिले नाही, तर यापुढे आंदोलन आणखी तीव्र करण्याचा इशारा ग्रामस्थांनी दिला आहे.