धुळे : घरफोडी करून सूरत गाठले. येथून विमानाने पळण्याच्या तयारीत असलेल्या सराईत गुन्हेगारास साथीदारासह स्थानिक गुन्हे अन्वेषण विभागाच्या पथकाने जेरबंद केले. (dhule news Arrived at the airport by burglary arrested by police)

गेल्या काही दिवसांपूर्वी दोंडाईचा येथे भर दिवसा घरफोडी करून सोन्या-चांदीचे दागिने व रोख रक्कम लंपास केल्याची तक्रार दोंडाईचा पोलीस (Police) ठाण्यात दाखल करण्यात आली होती. या चोरीच्या घटनेसंदर्भात पोलीस अधीक्षक प्रवीणकुमार पाटील यांनी संबंधित पोलीस ठाण्याच्या वरिष्ठ अधिकाऱ्यांना बोलावून या चोरीच्या घटनांवर आळा घालण्यासाठी आवश्यक सूचना दिल्या. घटनेचे गांभीर्य लक्षात घेता या चोरीचा छडा लावण्याचे आदेश दिले. त्यानुसार स्थानिक गुन्हा अन्वेषण विभागाच्या पथकाला देखील या चोरीच्या घटनेसंदर्भात तपास करण्यासाठी पाचारण करण्यात आले होते.

दिल्‍लीकडे जाण्याची तयारी

स्थानिक गुन्हे अन्वेषण विभागाच्या पथकाने आपले तपासाची चक्रे फिरवली असता या घटनेमागे नंदुरबार (Nandurbar) येथील इसम असल्याची माहिती समोर आली. तो सध्या सुरत येथे पळून गेला असल्याची देखील माहिती मिळाली. या अनुषंगाने स्थानिक गुन्हे अन्वेषण विभागाने सुरत (Surat) येथे पथक पाठवले असता सुरत येथील विमानतळावरून हा चोरटा दिल्लीच्या दिशेने पळणार असल्याने स्थानिक गुन्हे अन्वेषण विभागाने सूरत विमानतळावरच त्या चोरट्यांच्या मुसक्या आवळल्या. त्याने दिलेल्या माहितीनुसार त्याचे नंदुरबार येथील साथीदार देखील पोलिसांनी ताब्यात घेतले असून त्यांच्याकडून गुन्ह्याची कबुली देण्यात आली असून, चोरी केलेल्या मुद्देमालासह या चोरट्यांच्या स्थानिक गुन्हे अन्वेषण विभागाने मुसक्या आवळल्या आहेत.