धुळे : घरात होत असलेल्या वादात महिलेच्या माहेरच्यांनी वाद घातला. इतकेच नाही तर सासू आणि नणंद यांना मारहाण करण्यात आली आहे. त्यांना सोडविण्यासाठी गेलेल्या महिलेच्या दिरावर माहेरच्या मंडळींकडून जीवघेणा हल्ला करत चाकूने वार केले. यात सदर युवक गंभीर जखमी झाला असून त्याला उपचारासाठी जिल्हा रुग्णालयात दाखल करण्यात आला आहे. या प्रकरणी पोलिसात गुन्हा दाखल करण्यात आला आहे. 

धुळे शहरातील जुने धुळे परिसरात कौटुंबिक वादातून सदरची घटना घडली आहे. या घटनेत शिवकुमार राजेंद्र फुलपगारे (वय २७) असे जखमी झालेल्या तरुणाचे नाव आहे. दरम्यान फुलपगारे यांच्या घरात कॊणत्या तरी कारणावरून वाद सुरु होते. यानंतर फुलपगारे परिवारातील सुनेने माहेरच्या मंडळींना याबाबत माहिती दिली. यानंतर माहेरच्या मंडळींनी तिच्या घरी येत सासरच्या मंडळींशी वाद घालण्यास सुरवात केली. यातून वाद टोकाला गेला होता. 

मध्यस्थी करण्यासाठी गेला असता चाकूहल्ला 

या वादात माहेरच्या ११ जणांनी मिळून विवाहितेच्या सासू आणि नणंद यांना मारहाण केल्याची धक्कादायक घटना घडली आहे. आई आणि बहिणीला मारहाण होत असल्याचे पाहून वादात मध्यस्थी करण्यासाठी गेलेल्या लहान दिरावर देखील त्यांनी हल्ला चढविला. यात त्यांनी शिवकुमार याच्यावर चाकूहल्ला करण्यात आला. हल्ल्यात शिवकुमार याच्या मानेवर गंभीर वार करण्यात आल्याने यात तो गंभीर जखमी झाला आहे. 

पोलिसात गुन्हा दाखल 
घटनेत जखमी शिवकुमार फुलपगारे यास घरातील मंडळींनी लागलीच रुग्णालयात दाखल केले. त्याच्यावर सध्या धुळे सिव्हिल हॉस्पिटलमध्ये उपचार घेत असून या संदर्भात त्याची बहिणी भाग्यश्री फुलपगारे यांनी हल्ला करणाऱ्यांवर खुनाचा प्रयत्न केल्याचा गुन्हा दाखल करून कठोर कारवाई करण्यात यावी, अशी मागणी केली आहे. या प्रकरणात आझाद नगर पोलीस ठाण्यात गुन्हा दाखल करण्यात आला असून आरोपींना कठोर कठोर शासन करण्यात यावे अशी मागणी कुटुंबीयांनी केली आहे.