धुळे : महिला बचत गटाचे पैसे गोळा करून जाणाऱ्यांना रस्तात गाठत मारहाण केली. तसेच त्यांच्याजवळ असलेली रक्कम घेऊन चोरटे पसार झाले होते. यामध्ये चार जणांचा समावेश होता. दरम्यान बचत गटाच्या पैशांवर डल्ला मारणाऱ्या टोळीतील दोघा चोरट्यांना स्थानिक गुन्हे शाखेच्या पथकाने ताब्यात घेतले आहे. तर त्यांच्याकडून मुद्देमाल हस्तगत करण्यात आला आहे. 

धुळे जिल्ह्यात हा प्रकार घडला होता. दरम्यान ४ एप्रिलला रात्री आकाश कोळी हे बचत गटाचे पैसे गोळा करून जात होते. यावेळी अज्ञात चार जणांनी त्यांना मारहाण करून त्यांच्याकडे असलेले बचत गटांचे पैसै तसेच टॅब घेऊन पोबारा केला होता. रात्रीचा अंधार असल्याने आकाश कोळी यांना हे चोरटे हाती लागले नाहीत. यानंतर त्यांनी पोलिसात जात सदर घडल्या प्रकाराची माहिती पोलिसात देत तक्रार दाखल केली. 

दोघेजण पोलिसांच्या ताब्यात 
सदर गुन्ह्याचा तपास करत असताना स्थानिक गुन्हे शाखेच्या अधिकाऱ्यांना मिळालेल्या गुप्त माहितीनुसार लूटमार करणाऱ्या या टोळीतील बादल रमेश रामकोर आणि आनंद श्रावण सोनवणे यांना वरखेडी रोड परिसरातून ताब्यात घेण्यात आले आहे. पोलिसांनी केलेल्या चौकशीत त्यांनी आपल्यासोबत असलेल्या आणखी साथीदारांच्या मदतीने चोरी केल्याची कबुली दिली आहे. अन्य दोघांचा तपास पोलीस करत आहेत.  

२ लाख ३६ हजार रुपयांचा मुद्देमाल हस्तगत 

दरम्यान पोलिसांनी आरोपींकडून चोरीच्या पैशातून घेतलेली दुचाकी, तसेच गुन्ह्यात वापरलेली मोपेड गाडीसह टॅब आणि चोरीच्या पैशातून घेतलेला आयफोन 13 असा एकूण २ लाख ३६ हजार ४०० रुपयांचा मुद्देमाल जप्त केला आहे. दरम्यान या प्रकरणी पोलिसांकडून आणखी तपास सुरु आहे.