बालाजी सुरवसे 

धाराशिव : जंगलातून रानडुकराची शिकार करून ताची पर राज्यात तस्करी करत असल्याच्या आरोपावरून तरुणाला वन विभागाने ताब्यात घेत  कोंडून ठेवले होते. इतकेच नाही तर वन विभागाच्या अधिकाऱ्यांनी त्याला बेदम मारहाण केल्याचा धक्कादायक प्रकार धाराशिव जिल्ह्यात समोर आला आहे. 

धाराशिव (Dharashiv News) जिल्ह्यातील नळदुर्ग शिवारात रानडुक्कर हे शेतात लागवड केलेले पिके उध्वस्त करत होता. यामुळे शेतकऱ्यांचे मोठे नुकसान होत होते. दरम्यान परिसरातील शेतकऱ्यांनी या रानडुकराचा बंदोबस्त करण्यासाठी कोळी समाजातील तरुणांना बोलावले होते. त्यानुसार तरुणांनी डुकराला पकडले होते. यानंतर तरुण हे रानडुक्कर घेऊन जात असताना (Forest department) वन विभागाच्या कर्मचाऱ्यांनी त्यांना रस्त्यात अडवून डुकराची परराज्यात तस्करी करत असल्याच्या आरोपाखाली वन विभागाच्या ऑफिसला नेत कोंडून ठेवले होते. 

दरम्यान वन विभागाच्या अधिकाऱ्यांनी शिवराज कोळी या तरुणाला बेदम मारहाण केली. या तरुणाच्या अंगावर अक्षरशा मोठे वळ दिसत असून या तरुणाकडे यावं अधिकाऱ्यांनी दीड लाख रुपयांची मागणी केल्याचा आरोप देखील तरुणाने केला आहे. तर हे रानडुक्कर मारून हे तरुण परराज्यात तस्करी करत असल्याचा संशय आम्हाला असल्यामुळेच आम्ही ही कार्यवाही केली. मारहाण झाली हा आरोप जरी असला तरी त्याची चौकशी करू असं आश्वासन वन विभागाच्या अधिकाऱ्यांनी दिल आहे.