बालाजी सुरवसे 
धाराशिव : धाराशिव जिल्ह्यात आतापर्यंत ऐकीकडे सरासरीपेक्षा अधिक म्हणजे १६१ मिलीमीटर पावसाची नोंद झाली आहे. मात्र जिल्ह्यातील प्रमुख शहरांना पाणी पुरवठा करणाऱ्या प्रकल्पात अद्याप २५ टक्के सुध्दा पाणीसाठा झालेला नाही. यामुळे जिल्ह्यातील प्रमुख प्रकल्प चांगले भरण्यासाठी दमदार पावसाची प्रतीक्षा आहे. 

धाराशिव (Dharashiv News) शहराला उजनी धरणातून पाणी पुरवठा केला जातो. मात्र यामध्ये तेरणा व रूईभर येथील प्रकल्पाचाही आधार लागतो. उजनी धरणात सध्या ४५.३३ टीएमसी इतका पाणीसाठा आहे. त्यामुळे धाराशिवला सध्या पाण्याची चिंता नाही. मात्र रुईभर धरण कोरडे असुन तेरणात २१.४८ टक्के पाणीसाठा आहे. तर परंडा येथील सिना कोळेगाव प्रकल्पात मृत साठा आहे. त्यामुळे परंडा शहराला एका दिवसाआड पाणी पुरवठा (Water Supply) केला जात आहे. 

मांजर धरणात अजूनही मृतसाठा 

कळंब शहराला मांजरा प्रकल्पातुन (Manjra Dam) पाणी पुरवठा केला जात असुन धरण मोठे असल्याने पाऊस पाडल्यानंतर देखील यात अजूनही मृत साठा शिल्लक आहे. यामुळे शहराला दोन दिवसाआड पाणी पुरवठा केला जात आहे. त्यामुळे जिल्ह्यातील हे सर्व प्रकल्प समाधानकारक भरण्यासाठी दमदार पावसाची प्रतिक्षा आहे. चांगला पाऊस पडल्यानंतर हे प्रकल्प भरून पुढील दिवसातील पाणी टंचाईची समस्या मिटणार आहे.