गणेशोत्सव काही दिवसांवर आला आहे. त्यासाठी कोकणवासियांची लगबग सुरु झाली आहे. विघ्नहर्त्या गणपतीच्या दर्शनासाठी कोकणवासीयांची आतुरता वाढत असताना, दरवर्षीप्रमाणे यंदाही मुंबई-गोवा महामार्गावरील खड्डे आणि खराब रस्त्यांमुळे गणेशभक्तांच्या प्रवासात अडथळे निर्माण होणार आहेत. गणेशोत्सवाच्या काळात कोकणात जाणाऱ्या वाहनांची संख्या प्रचंड वाढते. मात्र, महामार्गावरील अत्यंत खराब स्थितीमुळे भक्तांच्या आस्थेच्या प्रवासात 'विघ्न' कायमच राहते.

रायगड जिल्ह्यातील रस्त्यांवर अजूनही मोठ्या प्रमाणात खड्डे असून, अपूर्ण रस्त्याच्या कामामुळे हा प्रवास अधिकच धोकादायक झाला आहे. विशेष म्हणजे, या महामार्गाच्या कामास तब्बल १८ वर्षे झाली असूनही ते पूर्ण झालेले नाही. दरवर्षी गणेशोत्सवाच्या तोंडावर मंत्री आणि लोकप्रतिनिधी या रस्त्याची पाहणी करतात, आश्वासनांची मालिका सुरू होते; मात्र प्रत्यक्षात काहीच बदल होत नाही.

या प्रश्नावर तोडगा काढण्यासाठी जनआक्रोश समितीने माणगाव येथे सहा दिवस उपोषण केले होते. त्यावेळी मुख्यमंत्री असलेल्या एकनाथ शिंदे यांनी रस्त्याच्या कामाला गती देण्याचे आश्वासन दिले होते. मात्र, त्यानंतर सत्तांतर घडले आणि महामार्गाच्या कामाची परिस्थिती पूर्ववतच राहिली. त्यामुळे यंदाही गणेशभक्तांना कोकणच्या दिशेने प्रवास करताना खड्डे, वाहतूक कोंडी आणि असुविधांचा सामना करावा लागणार आहे.