राज्याचे अन्न व औषध प्रशासन मंत्री नरहरी झिरवाळ यांचा एक आक्षेपार्ह व्हिडिओ व्हायरल झाला आहे. या व्हिडिओनंतर नरहरी झिरवाळांच्या अडचणीत वाढ झाली आहे. या व्हिडिओत नरहरी झिरवाळांसोबत एक तृतीयपंथी व्यक्ती असल्याचा दावा करण्यात येत आहे. यानंतर नरहरी झिरवाळांच्या राजीनाम्याची मागणी केली जात आहे.यानंतर आता नरहरी झिरवाळांचा राजीनामा घेणार की नाही, यावर देवेंद्र फडणवीसांनी भूमिका मांडली आहे.

नरहरी झिरवाळांचा राजीनामा घेणार? (Narhari Zirwal Resignation)

काल देवेंद्र फडणवीसांनी याबाबत माहिती दिली आहे. नरहरी झिरवाळांच्या राजीनाम्याची मागणी गेल्या अनेक दिवसांपासून होत आहे. मध्यंतरी त्यांच्या कार्यालयातून भ्रष्टाचाराचा प्रकार समोर आला होता. एका अधिकाऱ्याने लाच घेतली होती. तेव्हापासून त्यांचा राजीनामा घेण्यात यावा, अशी मागणी केली जात होती. त्यानंतर आता व्हिडिओ प्रकरणामुळे ही मागणी पुन्हा केली जात आहे. यावर खरंच नरहरी झिरवाळांचा राजीनामा घेणार का असा प्रश्न देवेंद्र फडणवीसांना विचारण्यात आला होता.

देवेंद्र फडणवीस नेमकं काय म्हणाले? (Devendra Fadnavis on Narhari Zirwal Resignation)

नरहरी झिरवाळांच्या राजीनाम्यावर देवेंद्र फडणवीस म्हणाले की, मागच्या काळात जी घटना घडली त्याची पूर्ण चौकशी झाली. त्यात कुठेही झिरवळांपर्यंत संबंध गेला नाही. आता जी घटना आहे, त्यामध्ये जे व्हिडिओ आहेत ते गंभीर आहेत. त्याची सत्यता पडताळणे गरजेचे आहे. जर हे व्हिडिओ खरे असतील तर त्यावर योग्य ती कारवाई होईलच. पहिल्यांदा तर त्यांच्यासोबत कोणाचे फोटो येतात, व्हिडिओ येतात याच्यावरुन आपल्याला या सर्व गोष्टी ठरवता येणार आहे. फोटो आणि व्हिडिओत सहभाग आहे का, सहभाग असेल तर कारवाई होईल. या प्रकरणात कोणालाही सोडण्याचे कारण नाही, असं देवेंद्र फडणवीसांनी म्हटलं आहे.