मुंबई - गोवा राष्ट्रीय महामार्गावरील निवळी घाटात आज सकाळी भीषण अपघात झाला. एलपीजी गॅस टँकर आणि प्रवासी मिनी बसमध्ये समोरासमोर धडक होऊन मोठा अपघात घडल्याची माहिती आहे. टँकरच्या जोरदार धडकेनंतर मिनी बस दरीत कोसळली, तर टँकरमधून गॅस लीक होऊन आजूबाजूच्या परिसरात आग लागली. मिनी बसमधील प्रवासी गंभीर जखमी झाले असून, सर्व जखमींना उपचारासाठी रूग्णालयात पाठवण्यात आले आहे. काहींची प्रकृती गंभीर असल्याची माहिती आहे.

रत्नागिरी - मुंबई गोवा महामार्गावर निवळी घाटात गॅस टँकरच्या धडकेने मिनी बस उलटली. मिनी बस थेट रस्त्याच्या कडेला असलेल्या दरीत कोसळली. मिनी बसमधील २० ते २२ प्रवासी जखमी असल्याची माहिती आहे. सर्व जखमींना रत्नागिरी जिल्हा शासकीय रुग्णालयात हलवण्यात आलं असून, काहींची प्रकृती गंभीर असल्याची माहिती आहे.

तर, गॅस टँकरमधून गॅस लिकेज झाल्यामुळे आगीचा भडका उडाला. या आगीत महामार्गालगतचं घर, आंब्याची बाग, चारचाकी, दुचाकी, रिक्षा यांचं मोठं नुकसान झालं असून, काही जनावरांना देखील आगीचा फटका बसल्याची माहिती आहे. अपघातामुळे महामार्गावरील वाहतूक पूर्णतः ठप्प झाली आहे. घटनास्थळी पोलिस, अग्निशमन दल, आणि आपत्कालीन सेवा तातडीने दाखल झाल्या असून, आग आटोक्यात आणण्याचे शर्थीचे प्रयत्न सुरू आहेत.

दरम्यान, अपघात नेमका कशामुळे झाला याची चौकशी सुरू असून, प्राथमिक माहितीनुसार वळणावर नियंत्रण सुटल्यामुळे टँकरने मिनी बसला धडक दिली असावी, असा अंदाज व्यक्त केला जात आहे. या घटनेमुळे परिसरात खळबळ उडाली असून, पोलिसांकडून अधिक तपास सुरू आहे.