राज्यात सध्या गुन्हेगारांच्या प्रकरणांमध्ये वाढ झाली आहे. एक धक्कादायक घटना छत्रपती संभाजीनगरमध्ये घडली आहे. एका सराईत गुन्हेगारानं भरचोकात रिक्षा चालकावर कोयत्याने वार केले आहे. कोयत्याने वार होत असतानाच रिक्षा चालकाने आपला जीव वाचवण्यासाठी तेथून पळ काढला. हा संपूर्ण प्रकार सीसीटीव्ही कॅमेऱ्यात कैद झाली आहे. या प्रकरणी आरोपीला बेड्या ठोकल्या असून, पोलिसांनी त्याची धिंड देखील काढली आहे.

आरोपी हा अट्टल गुन्हेगार असून, त्याच्या नावे बलात्कार, हत्या, लूटमारी यांसारखे तब्बल १५ गंभीर गुन्हे दाखल आहेत. आरोपी आणि रिक्षा चालकाचा एका गोष्टीवरून वाद झाला. आरोपीने थेट भरचौकात कोयता काढून रिक्षा चालकावर हल्ला केला. घाबरून पळ काढल्याने रिक्षा चालकाचा जीव वाचला. हा संपूर्ण प्रकार सीसीटीव्ही कॅमेरात कैद झाला आहे.

या प्रकरणाची माहिती समोर आल्यानंतर पोलिसांनी घटनास्थळी धाव घेतली. तसेच आरोपीविरोधात तक्रार दाखल केली. छत्रपती संभाजीनगर गुन्हे शाखेने १२ तासात आरोपी सय्यद फैजल (उर्फ तेजा) ला बेड्या ठोकल्या आहेत. एवढेच नाही तर गुन्हेगार तेजाला पोलिस आयुक्तालयात येथेच्छ पाहुणचार दिला.

तेजाने दहशत माजवलेल्या चौकात त्यालाच खाली मान घालून लंगडत पायी धिंड काढून माज उतरवला. तेजाने काही वर्षांपासून शहरातल्या वेगवेगळ्या भागात दहशत पसरवली होती. एखाद्या गुन्हेगारीच्या घटनेनंतर तो जेलमध्ये जातो. जेलमधून सुटल्यानंतर तू पुन्हा वाजत गाजत मिरवणूक काढत शहरात येतो आणि पुन्हा दहशत पसरवतो. आता पोलिसांनी रस्त्यावरच त्याची धिंड काढली आहे.