- चेतन व्यास

Wardha : अल्पवयीन मुलीचा विनयभंग करणाऱ्या युवकाला न्यायालयाने तीन वर्षे सश्रम कारावासाची शिक्षा ठोठावली आहे. रितीक विश्वेश्वर तुमडाम (वय २२) (राहणार बोरखेडी, ता. आर्वी) असे शिक्षा ठाेठावलेल्या युवकाचे नाव आहे. अतिरिक्त विशेष जिल्हा न्यायाधीश व्हि. टि. सूर्यवंशी यांनी ही शिक्षा सुनावली आहे. (wardha latest marathi news)

याबाबत अधिक माहिती अशी : ऑगस्ट २०१९ ला पीडित कॉलेज संपल्यानंतर वर्धा येथून बसने तिच्या गावी येत होती. यावेळी रितीक तिच्या बाजुला बसला होता. यावेळी त्याने पीडितेचा विनयभंग केला. शिवाय या प्रकाराबाबत पीडितेच्या भावाने त्याला हटकले असता त्याला मारण्यास धावला. त्यामुळे पीडिता व तिचा भाऊ घाबरून बस (bus) मधुन मध्येच येळावेळी येथे उतरले.

दुसऱ्या दिवशी पीडिता व तिचा भाऊ हे वर्धा बस स्थानकावर आले असता रितीक हा दारूच्या नशेत होता. त्याने पीडिताच्या भावाला मारण्यासाठी त्याच्या मित्राला बोलावले. या घडलेल्या प्रकारामुळे पीडिता घाबरली व तिने बस स्थानकावर पोलिसांना (police) बोलाविले. त्यांना घटना सांगितली व वर्धा पोलिस ठाणे गाठत तक्रार दाखल केली. (Maharashtra News)

या प्रकरणाचा तपास पोलिस उपनिरीक्षक मोहन घोंगडे यांनी केला. पुराव्याअंती न्यायालयात दोषारोपपत्र दाखल केले. यात सरकार तर्फे विशेष सरकारी अभियोक्ता विनय आर. घुडे यांनी युक्तीवाद केला. यात शासनातर्फे आठ साक्षीदार तपासण्यात आले.

Edited By : Siddharth Latkar