>> रुपाली बडवे

Coronavirus News: राज्यात कोरोनाचा संसर्ग वेगाने वाढतोय. गेल्या काही दिवसांपासून राज्यात कोरोना पॉझिटिव्ह रुग्णांची संख्या मोठ्या प्रमाणात आढळून येत आहे. गुरुवारी देखील राज्यात ८०३ नव्या कोरोनाबाधित रुग्णांची नोंद झाली आहे, तर आज दिवसभरात ३ कोरोनाबाधित रुग्णांचा मृत्यू झाला आहे. मृत्यू झालेल्या रुग्णांमध्ये मुंबई, ठाणे आणि जालन्यात रुग्णांचा समावेश आहे.

राज्यात आज दिवसभरात ६८७ रुग्ण बरे होऊन घरी परतले आहेत. राज्यातील आजपर्यंत कोरोनातून बरे झालेल्या रुग्णांची संख्या ७९९५२३२ वर पोहोचली आहे. यामुळे राज्यातील रुग्ण बरे होण्याचे प्रमाण ९८.१४ टक्के झाले आहे. आज एका रुग्णांचा मृत्यू झाला. यानंतर राज्यातील मृत्यूदर १.८२ एवढा आहे.

मुंबईतही कोरोनाचा वेगाने प्रसार

मुंबईत देखील कोरोनाबाधित रुग्णांची संख्या दिवसेंदिवस वाढत आहे. मुंबईत आज दिवसभरात २१६ नवे कोरोनाबाधित रुग्ण आढळून आले आहेत. तर एका ३६ वर्षीय कोरोना बाधित रुग्णाचे निधन झाले आहे.

मार्चपासून वाढतोय प्रादुर्भाव

मार्चपासून कोरोनाचा प्रादुर्भाव पुन्हा वाढण्यास सुरुवात झाली आहे. त्यामुळे प्रशासनाकडून देखील खबरदारी घेतली जात आहे. सर्व नागरिकांनी कोविड योग्य वर्तणूक करण्याचे आवाहन प्रशासनाकडून करण्यात आले आहे. (Latest Marathi News)

ही काळजी घ्या....

- गर्दीच्या ठिकाणी मास्क घालणे.

- शिंकताना किंवा खोकताना नाक किंवा तोंड झाकण्यासाठी रुमाल किंवा टिश्यू पेपर वापरणे.

- हात सतत स्वच्छ धुणे, सॅनिटायझरचा वापर करणे.

- आजारी असल्यास घरात विलगीकरणात राहणे.

- श्वसनाचे आजार असल्यास वैयक्तिक संपर्क मर्यादित करणे.

- ताप, सर्दी, खोकला अशी लक्षणे असल्यास त्वरीत डॉक्टरांना भेटणे. (Coronavirus)