रणजीत माजगावकर, साम टीव्ही

कोल्हापूर : कोल्हापुरात काँग्रेसचे उमेदवार शाहु महाराज यांनी लोकसभा निवडणुकीत शिंदे गटाचे उमेदवार संजय मंडलिक यांना मोठ्या मताधिक्याने धूळ चारली. लोकसभा निवडणुकीच्या प्रचारावेळी मुख्यमंत्री एकनाथ शिंदे यांनी काँग्रेसचे आमदार सतेज (बंटी) पाटील यांच्या टीकास्त्र सोडलं होतं. लोकसभेच्या निकालानंतर मुख्यमंत्र्यांच्या टीकेला आता काँग्रेसने बॅनरमधून प्रत्युत्तर दिलं आहे. आता कशी वाजली घंटी? अशा आशयाचे बॅनर लावत युवक काँग्रेसने मुख्यमंत्र्यांना प्रत्युत्तर दिलं आहे.

कोल्हापुरातील दाभोळकर कॉर्नर परिसरात युवक काँग्रेसच्याने एक अनोखे पोस्टर लावलं आहे. कोल्हापुरात या पोस्टरवरील मजकूर सध्या चर्चेचा विषय बनला आहे. काँग्रेसचे आमदार सतेज पाटील यांचा फोटो या पोस्टरवर आहे. तसेच या पोस्टवर आता कशी वाजली घंटी? असा मजकूर यावर लिहिण्यात आलेला आहे.

लोकसभेच्या निवडणुकीच्या प्रचारावेळी मुख्यमंत्री एकनाथ शिंदे यांनी काँग्रेसचे आमदार सतेज पाटील यांच्यावर टीका केली होती. 'बंटीची घंटी वाजवली पाहिजे, असं वक्तव्य मुख्यमंत्री शिंदे यांनी केलं होतं. याच पार्श्वभूमीवर युवक काँग्रेसच्या वतीने मुख्यमंत्री एकनाथ शिंदे यांना उद्देशून हे पोस्टर्स लावण्यात आलं आहे.

मुख्यमंत्री शिंदे काय म्हणाले होते?

दरम्यान, लोकसभा प्रचाराच्या सांगता वेळी महायुतीच्या रॅलीत मुख्यमंत्री शिंदे यांनी कोल्हापुरात काँग्रेस नेते सतेज पाटील यांच्यावर टीका केली होती. 'तुमचा टोल मी बंद केला. ८०० कोटी रुपयांची भरपाई सरकारने केली. बंटी पाटील यांना टोल लावला होता. त्यांची घंटी वाजवायची आहे. पुन्हा टोल नको ना? असा सवाल करत मुख्यमंत्र्यांनी टीका केली होती.