नागपूर : नागपूर विधान परिषद निवडणुकीच्या (Nagpur Legislative Council Election) मतदानाला अवघे काही तास उरले असताना काँग्रेसवर आपला उमेदवार बदलविण्याची नामुष्की ओढविली आहे. काँग्रेसचे उमेदवार डॉ. छोटू भोयर हे गांभीर्याने निवडणुक लढवत नसल्याच्या अनेक काँग्रेस मतदारांच्या तक्रारी होत्या. त्यामुळं छोटू भोयर ऐवजी अपक्ष उमेदवार मंगेश देशमुख यांना पाठिंबा जाहीर करण्याच्या तयारीत कॉंग्रेस आहे.

हे देखील पहा -

काँग्रेसचे विधान परिषदेचे उमेदवार छोटू भोयर हे भाजप BJP मधून आयात केलेले उमेदवार आहेत. भोयर यांचा मोठा गाजावाजा करत कॉंग्रेस मध्ये प्रवेश करण्यात आला. भाजप नगरसेवक आणि संघ स्वयंसेवक फोडून दाखविल्याबद्दल कॉंग्रेस नेत्यांनी आपली पाठ थोपटून घेतली होती. भोयर हे चमत्कार करतील असं सांगत त्यांना विधान परिषदेची उमेदवारी देण्यात आली. मात्र, प्रचारादरम्यान छोटू भोयर यांच्याबाबत नाराजी समोर आली. भोयर हे ताकदीने निवडणूक लढत नाहीत, कॉंग्रेस मतदारांशी संपर्क ठेवत नाहीत, ही निवडणूक त्यांनी गांभीर्याने घेतली नसल्याच्या अनेक तक्रारी कॉंग्रेस मतदारांनी केल्या आहेत.

त्यामुळं राज्याचे पशुसंवर्धन मंत्री सुनील केदार (Sunil Kedar) यांनी दोन दिवसांपूर्वी निवडणुकीचे सूत्र हाती घेतली. सर्व नगरसेवकांशी चर्चा केल्यावर शेवटी उमेदवार बदलण्यावर एकमत झालं. छोटू भोयर यांच्या ऐवजी अपक्ष उमेदवार मंगेश देशमुख यांना पाठिंबा देणार असल्याचं कळतंय. तसा प्रस्ताव पक्षाच्या हायकमांड कडे पाठविण्यात आलाय. मात्र, छोटू भोयर यांनी या चर्चा चुकीच्या असून आपणच काँग्रेसचे अधिकृत उमेदवार असल्याचा दावा केला आहे.

मात्र भाजपने या कॉंग्रेसच्या उमेदवार नाट्याचा चांगलाच आनंद आहे. काँग्रेसनं उमेदवार बदलला नाही बदलला तरी भाजपच जिंकेल असा विश्वास विरोधी पक्षनेते देवेंद्र फडणवीस (Devendra Fadnavis) यांनी व्यक्त केला आहे. कॉंग्रेस वर ऐनवेळी उमेदवार बदलण्याची कदाचित ही पहिलीच वेळ असेल. मात्र, यामुळं काँग्रेसवर मोठी नामुष्की ओढविलीय. कॉंग्रेस मधील कलह पुन्हा एकदा चव्हाट्यावर आल्याचं दिसून येत आहे.

Edited By - Jagdish Patil