लाडकी बहीण योजनेनंतर विद्यार्थ्यांसाठीही खास विद्यावेतन योजनेची घोषणा मुख्यमंत्री एकनाथ शिंदे यांनी आज पंढरपुरात केली आहे. बारावी पास झालेल्या विद्यार्थ्यांना सहा हजार , डिप्लोमा 10 आणि डिग्रीच्या विद्यार्थ्यांना 12 हजार रुपये विद्या वेतन देण्याची घोषणा केली आहे. आषाढी एकादशीच्या शासकीय महापूजेसाठी मुख्यमंत्री एकनाथ शिंदे पंढरपूरमध्ये दाखल झाले आहेत.

शासकीय महापुजेआधी पंढरपूरमध्ये कृषी उत्पन्न बाजार समितीच्या वतीने सुधाकर पंत परिचारक कृषी पंढरी महोत्सवाचं आयोजन करण्यात आलं होतं. या महोत्सवाचं उद्घाटनमुख्यमंत्र्यांच्या हस्ते करण्यात आलं. यावेळी पालकमंत्री चंद्रकांत पाटील महसूल मंत्री राधाकृष्ण विखे पाटील आदी उपस्थित होते.

अर्थमंत्री अजित पवार यांनी विधानसभेच्या पावसाळी अधिवेशनात महिलांसाठी लाडकी बहीण योजना सुरू करण्याची घोषणा केली होती. या योजनेतून महिला वर्गाला खूश करण्याचा प्रयत्न करण्यात आहे. त्यामुळे विद्यार्थ्यांना काहीच मिळालं नसल्याची टीका होत होती. मात्र मुख्यमंत्र्‍यांनी आज शासकीय महापूजेचं औचित्य साधून विद्यावेतन देण्याची घोषणा केली आहे. बारावी पास झालेल्या विद्यार्थ्यांना सहा हजार , डिप्लोमा 10 आणि डिग्रीच्या विद्यार्थ्यांना 12 हजार रुपये विद्या वेतन देण्यात येणार असल्याचं त्यांनी म्हटलं आहे.

राज्यात लाडकी बहीण योजना सुरू केली. पण लाडक्या भावाचं काय? असा प्रश्न विचारला जात होता. त्यांच्यासाठीही आम्ही योजना सुरू केली आहे. विद्यार्थी वर्षभर कंपनीत काम करेल, त्याला अप्रेंटीस म्हणून ही रक्कम दिली जाणार आहे. त्या कंपनीत तो ट्र्रेन होईल. अप्रेंटीशीपचे पैसे सरकार भरणार आहे.इतिहासात पहिल्यांदाच अशी योजना सुरू करण्यात आली आहे. राज्यातील मुलींसाठी १०० टक्के मोफत उच्च शिक्षणाची सोय आपण केल्याचंही त्यांनी सांगितलं.