योगेश काशिद, साम प्रतिनिधी

देशातील विद्यार्थ्यांचा आवाज बनलेल्या आणि नीट पेपरफुटीवरून सरकारला धारेवर धरणाऱ्या अभिजीत दीपके अडचणीत येण्याची शक्यता आहे. देशातील तरुणांसाठी हक्काची लढाई लढणाऱ्या दीपकेविरोधातच बीडमधील पोलीस बॉईज संघटनेनं आंदोलन करण्याचा इशारा दिलाय. पोलीस बॉईज संघटनेने आंदोलनाचा इशारा का दिलाय? नेमकं प्रकरण काय हे जाणून घेऊ.

एक-दोन दिवसापुर्वी ‘कॉक्रोच जनता पार्टी’चे संस्थापक अभिजीत दीपके यांनी एका पोलीस उपनिरीक्षकाला थेट आपल्या घराबाहेर काढलं होतं. पोलीस अधिकाऱ्याला त्यांचं नाव काय, पद काय असं विचारत दीपकेंनी त्या पोलीस अधिकाऱ्याला घराबाहेर काढलं होतं. त्याचमुळे आता अभिजीत दीपके अडचणीत येण्याची शक्यता आहे.

कॉक्रोच जनता पार्टीचे संस्थापक अभिजीत दीपके यांनी त्यांच्या निवासस्थानाच्या बाहेर थांबलेल्या पोलीस अधिकाऱ्याला घराच्या आवारातून बाहेर काढलं होतं. त्यावरून आता पोलीस बॉईज संघटना आक्रमक झाली आहे. अभिजीत दीपके यांनी त्या पोलीस अधिकाऱ्याचे पाय धरून माफी मागावी अन्यथा आम्ही रस्त्यावर उतरून लोकशाही मार्गाने आंदोलन करू असा इशारा पोलीस बॉईज संघटनेचे अध्यक्ष राहुल दुबाले यांनी दिलाय.

पोलीस हे त्यांच्या संरक्षणासाठीच काम करत आहेत. ती जबाबदारी पोलिसांची आहे.. आपले कर्तव्य बजावत असलेल्या अधिकाऱ्याला अशा पद्धतीने अवमानित करणे चुकीचे आहे. या प्रश्नावर आम्ही वरिष्ठ पोलीस अधिकाऱ्यांना निवेदन देत त्यांचे पोलीस संरक्षण काढण्याची देखील मागणी करणार असल्याचे पोलीस बॉईज संघटनेचे अध्यक्ष राहुल दुबाले यांनी केली आहे.

अभिजीत दीपके यांनी सोमवारपर्यंत पोलीस अधिकाऱ्याची माफी मागावी. जर दीपके यांनी माफी मागितली नाहीतर नाईलाजाने पोलीस अधीक्षकांच्या कार्यालयाला समोर चक्काजाम आंदोलन करावे लागेल. हा महाराष्ट्र लोकशाहीने चालणारा आहे. छत्रपती शिवाजी महाराज, छत्रपती शाहू महाराज, डॉ.बाबासाहेब आंबेडकर यांच्या विचाराने चालणारा आहे. ज्याच्या पाठिशी संरक्षण करणारा असतो त्याचा सन्मान केला पाहिजे.

ही छत्रपती शिवाजी महाराज यांची शिकवण आहे. पण आपण दिल्लीच्या पोलिसांना मारलं. महाराष्ट्र पोलीस काय चिल्लर आहेत असं वाटत असेल तर हे येथे चालणार नाही. असा अंहकार आला असेल तर आम्ही महाराष्ट्र पोलिसांच्या पाठिशी आहोत. सीजेपीच्या एका कार्यकर्त्याने मला फोन करून धमकी दिली. पण त्यांना मी शांत शब्दात सांगतिलं की, तुम्ही ज्या पोलीस अधिकाऱ्याचा अपमान केला, त्यांचे पाय धरून माफी मागावी, अशी मागणी दुबाले यांनी केली.