हळदीच्या कार्यक्रमात जुन्या वादातून हाणामारीची घटना घडली आहे. या मारहाणीत दोन बालक गंभीर जखमी झाले असून त्यांच्यावर खाजगी रुग्णालयात उपचार सुरू आहेत. ही धक्कादायक घटना नागपूर जिल्ह्यातील कामठी येथे घडली असून, या घटनेनंतर पोलिसांनी कारवाई करत तिघांना ताब्यात घेतले आहे. या प्रकारानंतर परिसरात खळबळ उडाली असून, पुढील तपास सुरू आहे.

मिळालेल्या माहितीनुसार, कामठी गावात हळदीचा कार्यक्रम ठेवण्यात आला होता. या हळदीच्या कार्यक्रमात शेजारच्या जुन्या वादातून दोन गटात बाचाबाची झाली. आरोपी अमित वाठोडे, अक्षय वाठोडे, शुभम गजभिये आणि एका महिलेने दारूच्या नशेत विनाकारण शिवीगाळ केली, ज्यामुळे हाणामारीला सुरुवात झाली.

या हाणामारीत काव्यांश पिल्ले (६ वर्ष) आणि त्याची मामेबहिण सानिया पिल्ले (१३ वर्ष) हे दोघे गंभीर जखमी झाले. आरोपींनी काठीने केलेल्या मारहाणीत ही मुले जखमी झाली असून परिसरात तणाव निर्माण झाला. या घटनेनंतर चिमुकल्यांना तातडीने रूग्णालयात नेण्यात आले. सध्या त्यांच्यावर खासगी रूग्णालयात उपचार सुरू आहेत.

या घटनेनंतर पोलिसांना याची माहिती देण्यात आली असून, पोलिसांनी तात्काळ कारवाई करून अमित वाठोडे, अक्षय वाठोडे, शुभम गजभिये या तिघांना ताब्यात घेतले आहे. पुढील तपास सुरू असल्याची माहिती पोलिसांनी दिली आहे. या घटनेनंतर परिसरात तणावाचे वातावरण निर्माण झाले होते.