भरत मोहळकर, साम टीव्ही, प्रतिनिधी

सरपंच हत्या प्रकरणानंतर पहिल्यांदाच मुख्यमंत्री देवेंद्र फडणवीस पहिल्यांदाच बीड जिल्ह्यात आले. विशेष म्हणजे आष्टीतल्या कार्यक्रमात एकमेकांवर तोफ डागणारे सुरेश धस आणि पंकजा मुंडे एकाच मंचावर आले. या कार्यक्रमात सुरेश धस आणि पंकजा मुंडे यांच्यात फिल्मी डायलॉगने स्टेजवर जोरदार जुगलबंदी रंगली. यावेळी धसांनी फडणवीसांचा उल्लेख बाहुबली असा केला तर हाच धागा पकडून फडणवीस बाहुबली तर आपण शिवगामी असल्याचं म्हटलं.

एवढंच नाही तर धस न मिळालेल्या मंत्रिपदाचाही उल्लेख करायला विसरले नाहीत.. मात्र मंत्रिपद नव्हे आपल्याला पाण्याची गरज असल्याचं सांगून दिवारमधली डायल़ॉगबाजी करत फडणवीसांच नव्हे तर उपस्थितांचीही मनं जिकली.

स्टेजवर रंगलेल्या कलगितुऱ्यानंतर धसांनी सरपंच संतोष देशमुख हत्या प्रकरणाचा उल्लेख करत राख, वाळू उपसणाऱ्यांवरही मकोका लावण्याची मागणी सुरेश धसांनी केली.. तर सरपंच संतोष देशमुख हत्या प्रकरणात कुणी कितीही मोठा असला तरी कारवाई करणारच, असं म्हणत फडणवीसांनी मुंडेंचं नाव न घेता थेट इशारा दिलाय.

मुख्यमंत्र्यांच्या दौऱ्यापुर्वी धनंजय मुंडेंच्या अनुपस्थितीची चर्चा रंगली होती. आपल्या डोळ्याच्या ऑपरेशनचं कारण देत मुंडे गैरहजर राहिले. मात्र धसांच्या मागणीनंतर मुख्यमंत्र्यांनी गुन्हेगारांना जाहीर इशारा दिल्यामुळे मुंडेंच्या अडचणीत वाढ होणार की मुंडेंना अभय मिळणार याकडे लक्ष लागलंय.