ही दृश्य बिहारची नाहीत....आपल्याच महाराष्ट्रातील आहेत.. चक्क लाथाबुक्क्यांनी रक्त येईपर्यंत छावा संघटनेंच्या कार्यकर्त्यांना राष्ट्रवादीच्या कार्यकर्त्यांनी मारहाण केलीये...खासदार सुनील तटकरेंच्या पत्रकार परिषदेत पत्ते फेकून कृषीमंत्र्यांच्या राजीनाम्याची मागणी केली म्हणून छावा संघटनेंच्या कार्यकर्त्यांना मारहाण करण्यात आली..

या मारहाणीत आघाडीवर होते, राष्ट्रवादीचे युवक काँग्रेसचे प्रदेशाध्यक्ष सुरज चव्हाण...या मारहाणीनंतर छावा संघटनेने धाराशिव, नांदेड, लातूर, संभाजीनगरमध्ये जोरदार निदर्शनं केली...राष्ट्रवादीनं सत्तेचा माज दाखवलाय, अशी टीका मारहाणीत जखमी झालेल्या विजय घाडगे यांनी केलीय..

दुसरीकडे या प्रकरणाची गंभीर दखल घेत राष्ट्रवादीच्या वरीष्ठांनी सुरज चव्हाण यांना राजीनाम्याचे आदेश दिले. दरम्यान, छावा संघटनेचे प्रदेशाध्यक्ष विजय घाडगे-पाटील यांना मारहाणीमुळे छातीत दुखू लागल्यानं ICU मध्ये हलवण्यात आलं. त्यातच सुरज चव्हाणांनी वाढता विरोध लक्षात घेता विजय घाडगेंची भेट घेऊन गैरसमज दूर करणार असल्याचं म्हटलंय.

आमदार निवासातील कँटिन कर्मचाऱ्याला मारहाण, विधानभवनातील हाणामारी आणि आता छावा संघटनेच्या कार्यकर्त्यांना खासदारासमोरच मारहाण.. सत्ताधारी नेत्यांच्या या कृत्यामुळे विरोधकांनीही संताप व्यक्त केलाय..

गेल्या काही दिवसांतील घटना पाहता राजकारणात स्तर घसरतोय, अशी टीका सर्वसामान्यांमधूनही होतेय. सत्ताधाऱ्यांची प्रतिमा मलीन होत असताना मुख्यमंत्री आणि दोन्ही उपमुख्यमंत्री पदाधिकारी, नेत्यांना समज देणार का? हाच खरा प्रश्न आहे.