रामू ढाकणे, छत्रपती संभाजीनगर|ता. २८ एप्रिल २०२४

मराठा आरक्षणाचे नेते मनोज जरांगे पाटील यांनी लोकसभेतून माघार घेतली असली तरी विधानसभेला उमेदवार देण्याची घोषणा केली आहे. आम्ही तयारी सुरू केली असून विधानसभेला मराठा मैदानात असेल, असे जरांगे पाटील म्हणालेत. छत्रपती संभाजीनगरमध्ये माध्यमांशी संवाद साधताना ते बोलत होते.

काय म्हणाले मनोज जरांगे पाटील?

"या निवडणुकीत मी नाही. मराठा समाजाने आता ठरवायचे. समाजाचा आता नाईलाज आहे.आम्ही कुणाला पाठिंबा दिला नाही, जो सगे सोयरे या विषयाच्या बाजूने आहे त्याचा विचार करा. विरोध करणाऱ्यांना असे पाडा की त्यांच्या दोन तीन पिढ्या वर येऊ नये. मी कुणाला कॉल केला नाही की कुणाला मतदान करायचे हे सांगितले नाही," असे मनोज जरांगे पाटील यावेळी म्हणाले.

यावेळी बोलताना मनोज जरांगे पाटील यांनी प्रकाश शेंडगे यांच्या गाडीवर शाईफेक झाल्याच्या घटनेवरही महत्वाचे विधान केले. "काही जण असे आहेत की ते स्वतः करतात आणि मराठ्यांवर नाव घालत आहेत. सहानुभूती मिळवण्यासाठी असे कटकारस्थान करत आहेत. मराठ्यांना बदनाम करण्याचे काम सुरू आहे," असे गंभीर आरोप त्यांनी केले.

भुजबळांवर टीका..

"आपण कधीच कुणाला विरोधक मानले नाही. येवला वाला सोडता मी कुणाला विरोधक मानले नाही. आपले कोणी विरोधक नाही, असे म्हणत जरांगे पाटील यांनी पुन्हा एकदा छगन भुजबळ यांच्यावर निशाणा साधला. तसेच पंतप्रधान मोदींनाही मराठा समाजाची भिती आहे, त्यामुळे प्रत्येक टप्प्यात त्यांना सभा घ्याव्या लागतात, इथेच मराठ्यांचा विजय.." असेही जरांगे पाटील म्हणाले.