राम ढाकणे, छत्रपती संभाजीनगर|ता. १६ जून २०२४

सोलापूर- धुळे महामार्गावर भीषण अपघाताची घटना समोर आली आहे. चालकाचे नियंत्रण सुटल्याने कार उलटून ही भीषण अपघाताची घटना घडली. या दुर्घटनेत चार जण गंभीर जखमी झाले आहेत. अपघातातील जखमींवर रुग्णालयात उपचार सुरू आहेत.

याबाबत सविस्तर माहिती अशी की, छत्रपती संभाजीनगर जिल्ह्यातील पाचपीर वाडी फाटा शिवारात सोलापूर धुळे राष्ट्रीय महामार्गावर चालकाचं नियंत्रण सुटल्यामुळे एका कारचा भीषण अपघात झाला. या अपघातामध्ये 4 जण गंभीर जखमी असून त्यांना पुढील उपचारासाठी घाटी रुग्णालयात हलवण्यात आहे आहे.

चालकाचे नियंत्रण सुटलं आणि ही कार भरधाव वेगात असल्यान नियंत्रणात आली नाही आणि त्यामुळे भरधाव कार चार- पाच वेळा उलटली. सुदैवाने यात कोणतीही जीवित हानी झाली नाही. अपघातातील सर्वजण हे गुजरात राज्यातील रहिवासी आहेत. अपघातात कारचे मोठे नुकसान झाले आहे.

दरम्यान, भंडाऱ्याच्या तुमसर बालाघाट राष्ट्रीय महामार्गावर एक भरधाव ट्रक अनियंत्रित होऊन पुलात शिरल्याची घटना घडली. सुदैवाने प्रसंगावधान राखून ट्रक चालकाने उडी घेतल्याने त्याचा जीव वाचला. या अपघातामुळे या मार्गावर काही वेळ वाहतूक कोंडी निर्माण झाली होती.